An der Emissioun "Background" hunn den Alain Origer, de René Meneghetti an de Georges Oswald iwwer d'Drogeproblematik zu Lëtzebuerg geschwat.

"Et kann net den Usproch vu Parquet a Police sinn, fir just d'Stroosse propper ze halen", dat sot de Procureur vum Bezierk Lëtzebuerg Georges Oswald e Samschdeg de Mëtten op RTL Radio Lëtzebuerg, hie war Invité am Background iwwer d'Drogeproblematik, mat och nach dem Alain Origer vum Gesondheetsministère a mam René Meneghetti vum Suchtverband.

De Parquet misst Enquêten en Profondeur maachen, an net just sech ëm dee méi visibelen Deel këmmeren, esou de Georges Oswald. An deem Sënn kéint een d'Zuel vu Protokoller och net mat enger effikasser Lutte géint Drogekriminalitéit gläichsetzen. Verschidden Enquêtë géinge Joren daueren an hätten awer e ganz groussen Impakt.

Et wier net sou, wéi dat dacks duergestallt géing ginn, datt d'Police um Terrain aktiv wier an de Parquet géing d'Leit nees lafe loossen, d'Zuele géingen dat och weisen. Et géingen effektiv séier nei Revendeuren nokommen. Dat wier awer och well d'Demande do wier, a well d'Leit Suen hätten.

Problematesche Drogekonsum huet sech verännert
An der Emissioun "Background" hunn den Alain Origer, de René Meneghetti an de Georges Oswald iwwer d'Drogeproblematik zu Lëtzebuerg geschwat.
RTL

© René Pfeiffer (RTL)

De Profil vun den Dealer wier ganz ënnerschiddlech, dat wiere Leit vun allen Nationalitéiten, souwuel Residenten, wéi net-Residenten. Spezifesch op der Stater Gare géing een de Phenomen observéieren, datt Leit just Daagsiwwer verkafe kommen an dann nees iwwert d'Grenz fort ginn. Anescht wéi nach viru puer Joer wieren et manner grouss kriminell Organisatiounen, déi do dohannert stieche géingen, ma lauter Persounen, déi relativ autonom organiséiert sinn.

D'Pressekonferenz vun der Stater Buergermeeschtesch Lydie Polfer nom Tëschefall mam Hond vun enger Sécherheetsfirma op der Stater Gare, huet de Procureur Oswald ganz problematesch fonnt... hei wiere Saache matenee vermëscht ginn, déi näischt mateneen ze dinn hätten.

Déi 3 Invitéen am Background hu betount, datt de problematesche Drogekonsum sech an deene leschte Jore verännert huet, well haut vill méi Kokain wéi Heroin um Marché ass, wat och en Impakt op d'Verhale vun de Konsumenten huet. Den Alain Origer vum Gesondheetsministère huet betount, datt d'Zuel vun héich-Risiko-Konsumenten an de leschte Jore proportionell gesinn éischter erof gaange wier. Beim Drogekonsum am allgemenge géing Lëtzebuerg ënnert der europäescher Moyenne leien, et hätt een awer gesinn, datt de Cannabiskonsum bei Jonke liicht geklomme wier. Dem René Meneghetti vum Suchtverband no géing ee grad bei Jonke gesinn, datt si Schwieregkeeten hätten aner Méiglechkeeten ze fannen, fir Drock ofzebauen.

D'Regierung huet nach keng Decisioun am Dossier Cannabis-Legaliséierung geholl, huet den Alain Origer betount. Déi lescht Joren hätt eng Task Force intensiv um Dossier geschafft an elo géing een op eng equilibréiert Léisung vun der Regierung waarden. Et misst awer op alle Fall eng Ännerung kommen, a wéi enger Vitesse dat géing geschéien, wier un der Politik ze decidéieren. An deem Kader stelle sech eng Abberzuel juristesch Froen, sou de Georges Oswald.

Den Däiwel géing hei am Detail leien an hie géing mat Spannung op déi praktesch Ëmsetzung waarden. Et misst een hei och un de Jugendschutz denken, sot sengersäits de René Meneghetti, et misst ee parallel vill Efforten an der Preventioun maachen, fir ze verhënneren datt de Konsum banaliséiert gëtt.

Background am Gespréich mam Thema Drogeproblematik

"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU an am RTL Play zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.