De grénge Vizepremier war Invité an der Emissioun "Background am Gespréich".

D’Regierung well ganz sécher keen “an den Eck“ drécken, sou François Bausch an eiser Emissioun Background. De grénge Vizepremier sot, hie géing d’Suerge vun de Leit, déi op der Marche Blanche géint d’Covid-Mesuren protestéiert hunn verstoen, mee hie wier awer net d’accord mat hinnen. Opgrond vu wëssenschaftleche Fakte wéisst een nämlech, datt d’Impfung viru schwéiere Verleef vun der Krankheet schützt an datt, wann de Gros vun de Leit geimpft wier, d’Spideeler net géingen iwwerlaascht ginn. Datt de CovidCheck-Regime erweidert gëtt d’nächst Woch, dat hätt d’Regierung proposéiert, well de Wanter elo kënnt, sou de François Bausch. Wéi all respiratoresch Krankheet géing de Virus sech an där Joreszäit méi verbreeden, well d’Leit méi Zäit banne verbréngen.

Senger Meenung no wieren déi nei Reegele vun nächstem Dënschdeg un nach ëmmer e „Kompromëss“,  well een, dee sech net impfe léisst, kéint net vun engem, dee geimpft ass, verlaangen, datt deen och muss méi Restriktiounen acceptéieren well d’Spideeler erëm iwwerlaascht wieren. Dem François Bausch no misst een och „raisonnabel bleiwen“, well d’Restriktiounen hei am Land awer manner streng gewiescht wieren ewéi op ville Plazen am Ausland.

Positiv politesch Visiounen

Am Background gouf vill iwwert d’Lag vun der Natioun vum Premier d’lescht Woch geschwat. Beim Thema Klima sot de grénge Vizepremier, et wier een a puncto Verbrauch vu fossiller Energie effektiv nach laang net do, wou ee wéilt, mee et hätt een e „puer Gäng“ eropgeschalt, notamment bei den erneierbaren Energien. D’Kritik, et géing der Regierung u Courage feelen, fir méi Klimaschutz ze maachen, huet hien net gëlle gelooss: „Wann Dir 10 Leit frot, solle mer eppes maache fir de Klimaschutz, da soen déi 10 'Jo'. Wann Dir da mat den éischten zwou Saache kommt, déi Dir wëllt maachen, da sinn et der vun 10 nëmmen nach vläicht 6 oder 7, déi 'Jo' soen, jee nodeem, wou Dir lant, nach 1 bis 2 an 8 sinn dogéint“.

Dowéinst wéilt hie léiwer doriwwer diskutéieren, wat fir eng Chance et wier, wann ee méi nohalteg lieft an datt een duerno net méi schlecht lieft ewéi haut. Dat selwecht gëllt dem François Bausch bei der Fro vun der Wuesstemsfal, eng Fal, well Lëtzebuerg fir all Rentner 2,5 nei Aarbechtsplaze braucht. Et kréich een d’Leit nëmme mobiliséiert, wann ee „positiv politesch Visioune“ proposéiere géing. Dowéinst géing hien och keng Politik géint den Auto maachen, mee fir eng aner, besser Mobilitéit. De Mobilitéitsminister wëll iwweregens fir Januar en neie Mobilitéitsplang fir bis 2035 proposéieren an am Virfeld eng ganz Rei Biergerversammlungen organiséieren.

„Net Normal“

E grousse Sujet am Background waren och de Logement an d’Steieren, e Sujet, deen dem François Bausch no och e grousse Sujet am Walkampf an zwee Joer wäert ginn. Iwwerdeems de grénge Vizepremier fir eng „equilibréiert“ Grondsteier plädéiert huet an ënnerstrach huet, datt den Haaptwunnsëtz net soll betraff sinn, huet hie sech virun allem fir eng méi héich Besteierung vun de Plus-valuen ausgeschwat, sou wéi den LSAP-Vizepremier Dan Kersch dat och scho gemaach huet. Wann zum Beispill en allgemenge Bebauungsplang (PAG) geännert gëtt an een op eemol net just zwee, mee sechs Stäck kéint bauen, da géing dat eng „kolossal“ Plus-value generéieren, wou ee selwer kee Merite huet, sou de François Bausch. Datt dat esou wéineg besteiert gëtt, dat wier „net normal“. Och „net normal“ wier iwwregens a sengen Aen och, datt bei Bauprojete Bierger ëmmer erëm kéinte Recourse maachen. De François Bausch huet dem Promoteur Marc Giorgetti ganz Recht ginn, datt et méi Prozedure géing ginn, fir ze bauen ewéi fir op de Mound ze fléien. De grénge Minister wollt d’Kritik eleng un den Ëmweltministère net gëlle loossen: senger Meenung no wier dee gréisste Problem, datt bei de verschiddenen Etappe vun engem Projet Bierger all kéiers kéinte géint de Projet kloen. De Bierger soll d’Recht hu Recoursen ze maachen, mee net „4,5,6,7 Mol“.

De François Bausch huet am Background u senger Decisioun festgehalen, no den nächste Walen net méi wëllen an enger Regierung ze sinn. Hie géing awer mat an d’Wale goen a freet sech, wann en erëm kéint Deputéierten an der Chamber sinn.

"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU an um RTL Play zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.