Invitéen an der Emissioun "Background am Gespréich" e Samschdeg waren de Mars Di Bartolomeo vun der LSAP, de Léon Gloden CSV an de Fernand Kartheiser ADR.

D'CSV steet ganz kloer zur Verfassung an zu de 4 Kapitelen, déi an der Institutiounekommissioun ausgeschafft goufen, mä mir lauschteren op d'Vollek a fäerte kee Referendum, dat sot den CSV-Deputéierten a Rapporter vum Justizkapitel vun der Verfassungsreform Léon Gloden bei eis am Background. Hie géif op alle Fall sou laang kämpfe wéi et méiglech, datt pro Kapitel e klore Jo erauskënnt. Déi ëffentlech Petitioun, vun där d'CSV hir Approche zum Referendum ofhängeg mécht, wier eng Petitioun géint déi 4 Kapitelen, huet den Ost-Deputéierten och erkläert, un deenen hie wéi gesot mat dru geschafft huet.

"CSV léisst sech vun der ADR dreiwen"
Invitéen an der Emissioun "Background am Gespréich" e Samschdeg waren de Mars Di Bartolomeo vun der LSAP, de Léon Gloden CSV an de Fernand Kartheiser ADR.

Den LSAP-Deputéierten a President vun der Institutiounekommissioun Mars Di Bartolomeo huet drun erënnert, datt déi grouss Verfassungsrevisioun schonn no engem Referendum a Kraaft wier, wann d'CSV net schonn net de leschte Walen hir Meenung geännert hätt an de Konsens aus der Institutiounekommissioun opgekënnegt huet. Deen neie Revirement vun der gréisster Fraktioun am Parlament wier Opportunismus pur. D'CSV géif probéieren d'ADR ze kopéieren a géif hir Haltung vun enger Petitioun ofhängeg gemaach, déi kloer géint d'Aarbecht geet, déi an der Chamber an de leschte 15 Joer um Verfassungstext gemaach gouf.

E Schlag an d'Gesiicht och fir de fréieren CSV-Deputéierten Paul-Henri Meyers, dee laang Joren um neie Verfassungstext mat geschafft huet. Sou laang hien an der CSV eppes ze soen hätt, géif een d'ADR net imitéieren, huet den Léon Gloden gekontert. Iwwer Interna, wéi de Sënneswandel zustane komm, wollt hien net schwätzen.

D'ADR huet sech vun Ufank u fir e Referendum iwwert de Verfassungstext staark gemaach an dat déi lescht Wochen och kloer artikuléiert. Déi alternativ demokratesch Reformpartei formuléiert hefteg Reprochen zu deem, wat an de geplangte Reformkapitele steet. Et géif si arrangéieren, datt d'CSV och elo fir e Referendum ass, mä et wier dach eng bosseg Prozedur. Hie géif awer nëmmen hoffen, datt déi ëffentlech Petitioun zum Sujet vu 25.000 Leit ënnerschriwwe gëtt, sou de Fernand Kartheiser. Eng Petitioun, déi iwwregens vun engem CSV-Member erabruecht gi wier.

Déi ganz Verfassungsdebatt hätt gewisen, datt d'ADR eng wichteg Roll am politesche Liewen spillt, huet de Fernand Kartheiser nach gemengt.  Eng wier arrogant vun uewen erof ze soen, wat gutt fir d'Leit wier a se fir domm ze halen. Et wier un de Leit ze decidéieren an un de Politiker Rechenschaft ofzeleeën. LSAP an CSV hunn der ADR reprochéiert, mat falsche Fakten z'operéieren, zum Beispill wa se behaapt, mat der Verfassungsreform géif en Auslännerwalrecht duerch d'Hannerdier agefouert oder datt de Grand-Duc seng Rechter geschwächt ginn.

D’CSV géif sech hei vun der ADR dreiwe loossen, huet de Mars Di Bartolomeo bedauert a gemengt, datt d’Original ëmmer besser wär wéi d’Kopie. De Léon Gloden huet gekontert, et wär een eng Vollekspartei, déi op d’Leit lauschtert. Et wär een net populistesch a géif d’ADR net imitéieren. A sou laang hien eppes an der CSV kéint matbestëmmen, wär dat och net de Fall.

Déi ganz Verfassungsdebat hätt gewisen, datt d'ADR eng wichteg Roll am politesche Liewen spillt, huet de Fernand Kartheiser nach gemengt. Et wier arrogant vun uewen erof ze soen, wat gutt fir d'Leit wier a se fir domm ze halen. Et wier un de Leit ze decidéieren an un de Politiker Rechenschaft ofzeleeën.

LSAP an CSV hunn der ADR reprochéiert mat falsche Fakten z'operéieren zum Beispill, wa se behaapt mat der Verfassungsreform géif en Auslännerwalrecht duerch d'Hannerdier agefouert ginn. Dat wäre «Fake News à la Trump», sou de Mars di Bartolomeo.

Kloer gouf och nach emol gesot, datt wann d’CSV 2019 hir Meenung net geännert hätt, wär den deemolegen Text per Referendum zum Vott gestallt ginn. An sou kéint eng nei Verfassung elo scho gëllen.

Background am Gespréich mam Thema Verfassungsreform

"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU an um RTL Play zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.