Invité an der Emissioun "Background am Gespréich" e Samschdeg war den neie Co-Fraktiounspresident vun der CSV.

D'Denonciatioun beim Parquet géing een nach emol maachen, dat huet de Co-Fraktiounspresident vun der CSV, de Gilles Roth, e Samschdeg de Mëtteg an der Emissioun Background am Gespréich. Et wier kee politeschen Manöver gewiescht, fir de Frank Engel lasszeginn, et hätt ee keen anere Choix gehat, et misst ee sech un d'Strofrecht halen.

An der Affär CSV-Frëndeskrees geet et jo ënner anerem ëm eng eventuell fiktiv Beschäftegung vum Ex-President Frank Engel.

Huet d‘Fraktioun Drock gemaach, fir datt Membere vun der Parteileedung en Avis juridique ënnerschreiwen, deen de Frank Engel belaascht? Déi Fro huet de Gilles Roth mat „Nee“ beäntwert.

D‘Urteel kënnt den 9. Dezember an hie wéilt e Prozess, deen nach am Gaang ass, net weider kommentéieren, sou den Invité am Background. Mam Frank Engel géing et weider kee Kontakt méi ginn an et wéilt een dat Kapitel als CSV lo ofschléissen.

Déi schlecht Ëmfroe fir d‘CSV soll een net schéi schwätzen an et soll een net d‘Feeler bei déi aner siche goen. Trotzdeem wier et eng Momentopnam. D‘CSV misst sech lo manner mat sech selwer beschäftegen an no vir kucken an de Leit fir 2023 eng valabel Alternativ zur 3er-Koalitioun bidden.

Wier bei der CSV géing Spëtzekandidat ginn, géing ee méi spéit decidéiere wéi bei de leschte Walen. 2023 am Fréijoer wéilt een dat maachen. Do géing an enger Ekipp eng Decisioun geholl ginn an hie géing sech an den Déngscht vun der Partei stellen.

Wat dat nächst Covid-Gesetz ugeet, sou kéint d‘CSV sech zu deem nach net definitiv positionéieren, well nach kee fäerdegen Text um Dësch läit. Sou gutt wéi d‘Regierung déi Kris am Ufank gemeeschtert hätt, sou drënner an driwwer wier et awer lo an der Lescht gaangen. A puncto Impfung wier net gutt kommunizéiert an net genuch sensibiliséiert ginn.

Datt Ministere matten an enger Kris demissionéieren, wier speziell. Hie wier op alle Fall iwwerrascht iwwer dem Finanzminister Pierre Gramegna säi Récktrëtt. Der Nofollgerin Yuriko Backes sollt een lo eng Chance ginn.

Eng grouss Steierreform kënnt jo wuel net méi. Fir de de Gilles Roth sollten an dëser Legislaturperiod awer eng Partie Adaptatioune kommen, déi d‘Leit steierlech entlaaschten.

Rezent waren et op sozialen Netzwierker Diskussiounen iwwer eng Schi-Pist an eng Schnéikanoun um Mamer Chrëschtmaart ginn. Do géing een no der Chrëschtvakanz de Bilan maachen an da géing een decidéieren, ob een dat nach eng Kéier mécht, sou de Mamer Député-maire Gilles Roth.

Background am Gespréich: Gilles Roth

"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU an um RTL Play zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.