An der Emissioun "Background am Gespréich" e Samschdeg waren 2 Membere vum nationalen Ethikrot an ee Member vun der consultativer Mënscherechtskommissioun.

Invitéiert am Background waren d’Karin Weyer, Psychologin, Direktesch vum Centre contre la radicalisation respect.lu a Member vum nationalen Ethikrot, den Daniel Becker, Economist, Generalsekretär vum Conseil économique et social a Vizepresident vum nationalen Ethikrot, an de Frank Wies, Affekot a Member vun der consultativer Mënscherechtskommissioun.

Background am Gespréich vum 15. Januar 2022

Ëm d'Corona-Kris, den Impakt op eis Gesellschaft an d'Empfanne vun de Leit goung et e Samschdeg de Mëtteg an der Emissioun Background. An enger Kris géif de Mënsch probéieren, sech unzepassen a kéint dat Gott sei Dank och, sou d'Karin Weyer vum Centre contre la radicalisation. Mir hätte geléiert, eng nei Normalitéit an der Kris ze fannen. Mir missten awer och nees léieren, mat Risiken ze liewen. Wat an der Lescht geännert huet, wier d'Natur vun den Onsécherheeten, huet den Ekonomist Daniel Becker a Vizepresident vum nationalen Ethikrot gemengt. D'Leit misste léieren, domadder ëmzegoen a léieren, mat engem Virus ze liewen, deen net méi sou einfach verschwanne géif. Den Affekot a Mënscherechtler Frank Wies gesäit déi aktuell Kris als Rappell, dass d'Welt u sech onsécher ass an dass déi westlech Gesellschaft virdrun an enger Illusioun gelieft huet. D'Corona-Kris kéint een awer net méi ausblennen a jidderee wier dovunner betraff, am Géigesaz zu anere Krisen, wéi der Migratiounskris oder dem Klimawandel.

Kommunikatioun an der Corona-Kris

D'Pandemie hat an huet och en Impakt op eis Diskussiounskultur. Et misst een nees léieren, iwwer d'Meenungsverschiddenheeten an iwwer Differenzen ewech nees mateneen ze schwätzen an och dem aneren nozelauschteren, sou d'Karin Weyer. Extrem wichteg wier et fir déi Verantwortlech, ganz transparent ze kommunizéieren, wat haut gewosst ass a wat net. Et kéint kee viraus gesinn, wat haut an dräi Woche wier, huet den Affekot Daniel Becker gemengt. Dem Frank Wies no géif an der ëffentlecher Diskussioun e bësschen ze kuerz kommen, wat eigentlech Zil ass a wat et un Alternative gëtt. Fir d'Politik wier et sécher net einfach, a sou enger Zäit Decisiounen ze huelen, mä se misst awer vläicht besser op d'Proportionalitéit oppassen. De Fait, net alles haut ze wëssen, géif an engem Widdersproch stoe mat dem Leit hirem grousse Bedürfnis no Sécherheet, sou d'Karin Weyer. Hei wier deels och Vertraue verluer gaangen, well d'Politik net kloer seet, wéi evolutiv d'Situatioun ass.

Wéi ëmgoe mat Fake News?

Et misst e breeden Debat driwwer gefouert ginn, wéi an ob ee falsch Behaaptungen, also Fake News, an Zukunft soll bestrofen. Den Ament ass et jo net strofbar, fir falsch Informatiounen an den Internet ze setzen. Dobäi wier et och deels e Problem, dass verschidde Behaaptungen anonym gemaach ginn, erkläert de Vizepresident vum Ethikrot Daniel Becker.

Meenungsäusserung huet och seng Grenzen, sou den Affekot Frank Wies. Hie géing do eng Parallel gesi mam „Opruff zum Haass", wat hei am Land strofbar ass. Et wier awer op alle Fall och eng Fro vum Impakt. Wa renomméiert Wëssenschaftler oder Dokteren, wéi den Dr Raoult a Frankräich eppes behaapten, dann hätt dat och e méi groussen Impakt. Wann also Falsch-Informatioune vun esou Leit an d'Welt gesat géinge ginn, déi och nach seriö riskéieren, anere Leit ze schueden, da misst dat strofbar sinn. Mä eng oppressiv Schinn eleng géing do net duergoen, sou de Frank Wies. Et bräicht och eng besser Mediekompetenz, besonnesch op de sozialen Netzwierker, hunn d'Invitéeë gemengt.

Misst een d'Leit net virun hirer eegener Dommheet schützen? Dozou seet d'Karin Weyer, „jiddereen dierf säi Liewe sou ruinéieren, wéi een et wëll", ma et misst een deene Leit awer gläichzäiteg eng Hëllefsstellung ginn, fir Desinformatioun a Ligen z'erkennen. A besonnesch misst een eelere Leit hëllefen, fir méi kritesch mat soziale Medien ëmzegoen, am Géigesaz zu Jonker wäre si nämlech net domadder grouss ginn.

Radikaliséierung an Diskussiounskultur

Déi sozial Medie sinn keng Plattformen, wou et zu Debatte kënnt. Do posaunt deen ee seng Meenung eraus, an deen anere seng, ma se géingen ni an d'Gespréich kommen an dat géing einfach feelen, sou d'Psychologin an d'Direktesch vum Zenter géint d'Radikalisatioun Karin Weyer. Fir dann ze verhënneren, dass Leit ëmmer an hirem Mikro-Kosmos bleiwen a sech do eventuell och radikaliséieren, misst een nees Fore schafen, wou ka kontrovers debattéiert- a matenee gestridden ginn. Doranner wäre mer hei am Land awer souwisou nach ni ganz gutt gewiescht, sou d'Karin Weyer.

D'ADR hätt an deem Kontext de klasseschen Rôle vun engem „Schmarotzer" ageholl, fënnt de Frank Wies. Si wären op Stëmmefaang gaangen. Dass et an der Politik e gewëssenen Opportunismus gëtt, wär bal normal, mä hei wier sech d'ADR awer wuel net dem Impakt bewosst, deen dat hätt, wann eng Partei Zeitunge kritiséiert, ee Chefredakter attackéiert a Plainte géint hie mécht, sou den Affekot.

Wa Leit bis an deem Milieu dra wieren, wär et op alle Fall wichteg, se net falen ze loossen, sou nach d'Karin Weyer. Et dierft een d'Brécken net ofrappen, well den Ament, wann d'Leit vläicht nees een Auswee sichen, da misst een iergendwou hin "zeréck" kommen an dat wieren dacks Frënn a Famill oder eben den Zenter géint d'Radikalisatioun.

"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU an um RTL Play zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.