An der Emissioun "Background am Gespréich" war den LSAP-Aussen- an Immigratiounsminister Jean Asselborn eisen Invité.

Eng militäresch Interventioun ass déi falsch Optioun, ech gleewen un d'Diplomatie. Dat seet de Lëtzebuerger Ausseminister Jean Asselborn an der RTL-Emissioun Background am Gespréich. Hie gleeft net, datt Russland d'Ukrain ugräift an awer wier ee leider do ukomm, datt een näischt méi kéint ausschléissen. Säi Bauchgefill géing him soen: et kéint eppes geschéien, wat falsch wier. Um Terrain hätt sech villes an déi falsch Richtung beweegt, seet de Jean Asselborn mat Bléck op de militäreschen Deployement. Hien hätt awer d'Hoffnung net verluer. De Westen hätt op jiddefalls grouss diplomatesch Efforte gemaach. Eng einfach Léisung géif et awer net ginn, sou de Jean Asselborn.

Op alle Fall sollten international Ofkommen aus de 90er Jore respektéiert ginn. Sollt et awer zu enger Attack kommen, da misst de Westen op alle Fall mat systemesche Sanktiounen äntweren, déi de Russen awer och eis géinge wéidoen. Et kéint een zwar net ouni d'Europäer diskutéieren. Ma déi, déi Drock op Russland kënne maachen, sinn d'Amerikaner. De President Joe Biden wier wuel deen eenzegen, deen a leschter Instanz d'Saache kéint beaflossen. Déi nei amerikanesch Regierung hätt sech bis elo och richteg verhalen, sou de Lëtzebuerger Diplomatie-Chef.

Mat Bléck op d'olympesch Spiller zu Peking seet de Jean Asselborn, datt déi Spiller nu mol do wieren. Hie wier als Sportminister op alle Fall dohinner gaangen an hätt verschidde Saachen ugeschwat. De Grand-Duc Henri hätt dat am Numm vu Lëtzebuerg och gemaach, sou de Minister. Sport a Politik kéint een net trennen. Den Olympesche Comité misst an Zukunft gutt oppassen, wien d'Spiller kritt. D'Leit hätten es genuch vum Gigantismus an datt Staaten d'Olympesch Spiller organiséieren, déi d'Mënscherechter net respektéieren.

An der Migratiounsfro géing d'Europäesch Unioun zënter 7 Joren net als Unioun optrieden, bedauert den Ausseminister Jean Asselborn. Leider géing eng Koalitioun ronderëm Éisträich en éierbare Repartitiounsmodell blockéieren. Wann et sou weidergeet, géing souguer de Schengen-Modell riskéieren ze falen.

Zu Lëtzebuerg hätte mer e Problem, fir Leit ze logéieren. Vill Gemengen hätten Efforte gemaach, ma et misst een nach weiderer mat an d'Boot kréien.

De Jean Asselborn huet confirméiert, datt hien 2023 mat 74 Joer nach emol mat an d'Wale geet. Fir staark ze sinn, muss ee Wale gewannen, an hie wier dobäi, bis hien net méi säi Bescht ka ginn. Déi, déi duerno kommen, hätten dann d'Méiglechkeet, aus der Stäerkt eraus Politik ze maachen, sou nach de Jean Asselborn.

Background am Gespréich Jean Asselborn

"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU an um RTL Play zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.