An der Emissioun "Background am Gespréich" war de Minister fir d'Fonction Publique a fir d'Digitalisatioun eisen Invité.

Wéi d'Regierung d'Coronakris geréiert huet, dat ass dem DP-Minister Marc Hansen no, wat d'Leit interesséiert. "All déi aner Saachen", d'Mobbing-Affär vum Monica Semedo, d'Plagiatsaffär vum Xavier Bettel oder nach d'Kritik géint d'Corinne Cahen wéinst den Doudegen an den Altersheemer, "dat ass elo laanscht", esou de Marc Hansen e Samschdeg an eiser Emissioun Background. Hie mengt, d'Leit hei am Land géinge "ganz gutt wëssen", wéi se d'Aarbecht vun der Regierung solle bewäerten a well laut Sondagë 75% vun de Leit d'accord si mat de Covid-Mesuren, ass hien optimistesch, wat d'Walen am Oktober 2023 ugeet.

Säin eegene Score bei de leschte Walen (8.500) wier eng kloer Verbesserung par Rapport zu 2018 (6.000). Datt reporter.lu an engem satiresche Wocheréckbléck de Geck gemaach huet, kee wéisst, wien de Marc Hansen wier, fënnt hie "perfekt". Dat wier nämlech genee seng Aart a Weis ze schaffen. "Ech gehéieren net zu deenen, deen all Dag bei Iech um Tapis steet, fir mat engem Scoop eragetrollt ze kommen", esou de Marc Hansen, deen awer op Nofro net wollt aner Ministeren domat gemengt hunn.

3,8 Milliounen digital Demarchen

De Marc Hansen ass delegéierte Minister fir d'Digitaliséierung a fir d'simplification administrative a Minister fir d'Fonction publique. Mat him goung och rieds iwwert d'Warnsystemer vun der Regierung. Déi stoungen ënner Kritik, well déi dofir virgesi "Gouvalert"-Handy-Applikatioun bei de schwéieren Onwiedere leschte Summer eréischt ganz spéit eng Warnung erausginn huet. D'Applikatioun wier scho verbessert ginn. Wéinst dem Stuerm e Freideg waren dunn SMS-Warnungen erausgaangen, déi iwwert d'Provideren un d'Leit hei um Territoire geschéckt goufen. Dat hätt zimmlech gutt geklappt, esou de Marc Hansen. Et géing awer sécher an den nächsten Deeg en "Debriefing" gemaach ginn.

Duerch d'Pandemie wier een a Saachen Digitalisatioun op engem ganz anere Punkt wéi virdrun. De Minister sot, virun der Pandemie wier ee bei 300.000 digitalen, administrativen Demarchë vu Leit a Betriber pro Joer gewiescht, d'lescht Joer wier ee bei 3,8 Milliounen Demarchen. En anert Beispill: virun 2020 hätte kaum Mataarbechter beim Staat vun doheem aus geschafft. Antëscht hätt een do eng enorm Entwécklung gesinn. De Marc Hansen huet an der Emissioun och all d'Initiativen verdeedegt, fir de Leit ze hëllefen an ze verhënneren, datt se den Uschloss verléieren. D'Kritik, den Uschloss, de Reseau wier net gutt hei am Land, huet hien och net gëlle gelooss: Lëtzebuerg wier eent vun deene Länner, déi am Beschte vernetzt wieren an an den europäeschen Indexen, wat den "e-government" ugeet, op 6. Plaz.

Keng Kaddoe fir d'Fonction Publique

De Marc Hansen huet och eng staark Fonction publique verdeedegt a kritiséiert, wann ee mat Stereotyppe géing den ëffentleche Secteur géint de private Secteur spillen. Hien huet gefrot, ob et da schlecht wier, datt Leit aus dem private Secteur bei de Staat wiesselen. Ëmmerhi géingen d'Betriber och eng effikass Fonction publique verlaangen.

Am leschte Gehälteraccord vun 2021 huet d'Staatsbeamtegewerkschaft CGFP wéinst der Kris acceptéiert, op Haussë vun de Paien ze verzichten. Op d'Fro, ob dat vum Timing hier de Minister géing arrangéieren, well hien da virun de Walen am nächste Gehälteraccord kéint "Kaddoen" maachen, huet de Minister puermol geäntwert: "fir mech ginn et keng Kaddoen, ech sinn do, fir datt de Staat effikass fonctionéiert".

Fanger wech vum Index

Aus Aktualitéitsgrënn gouf de Marc Hansen och zur Situatioun an der Ukrain befrot. Wat fir hie méi wichteg wier ewéi eventuell wirtschaftlech Sanktiounen oder Konsequenzen, dat wier, datt op béide Säite vun der ukrainesch-russescher Grenz onschëlleg Leit sëtzen, déi mat näischt eppes ze dinn hunn an déi fäerten. D'Regierung géing sech trotzdeem op Konsequenze preparéieren. D'Finanzministesch Yuriko Backes géing u Mesurë schaffen, fir den Impakt vu méi héijen Energiepräisser ofzefiederen. Duerch den Index wier Lëtzebuerg awer och souwisou scho besser preparéiert wéi aner Länner. An um Index géing sécher net gefréckelt ginn, do war de Marc Hansen op Nofro hi formell.

Background am Gespréich mam Marc Hansen


"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video).
Dono ass d'Emissioun op RTL.LU an um RTL Play zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.