D'Josiane Jacob, de Paul Nathan an den Tom Oberweis waren e Samschdeg Invitéen an der Emissioun Background.

"Et ass eng Kris an der Kris", sou hunn 3 Entrepreneuren an onser Emissioun Background hei op RTL d'ekonomesch Konsequenze vun der Pandemie an dem Krich an der Ukrain beschriwwen. De Paul Nathan, Directeur technique an enger Bauentreprise, huet vun enger immens imprevisibeler Lag an extrem volatille Präisser geschwat. D'Josiane Jacob, Patronne vun engem Holzbetrib, sot, d'Präisdeierecht kéint een am Moment nach net 1:1 op d'Clientë weiderginn. Dat confirméiert och den Tom Oberweis, President vun der Chambre des Métiers. D'Betriber géingen den Ament, besonnesch no zwee schwéiere Joer Pandemie, eng dräifach Belaaschtung spieren duerch méi deier Matière-premièren, méi deier Energiepräisser an och eng Erhéijung vun de Salairen duerch den Index.

Den Tom Oberweis huet Merci gesot fir d'finanziell Hëllef vum Staat wärend der Pandemie, mä d'Aidë sollen a sengen Ae punktuell bleiwen an et misst een éischter d'Fundamenter schafen, fir datt d'Betriber kënne funktionéieren. Verschidde Mesuren, ewéi d'zousätzlech Feier- a Congésdeeg, wiere schwéier ze verkraaften.

Et muss iwwer den Index geschwat ginn, ouni Tabu

Déi 3 Invitéen hu sech net fundamental géint den Index ausgeschwat, dem System vun automateschen Upassunge vun de Salairen un d'Inflatioun. Allerdéngs wier den Index en Däiwelskrees, well duerch d'Hausse vun de Salairen an d'Käschten dovunner och d'Präisser dobaussen nees ugepasst ginn. Donieft géing d'Kompetitivitéit vun de Betriber dorënner leiden, sou d'Josiane Jacob. De Paul Nathan sot, 3 Indextranchë géinge bei senger Firma a bei 250 Salariéen den Equivalent vun 19 zousätzleche Mataarbechter duerstellen. A senger Firma, sou den Tom Oberweis, wier eng Indextranche 300.000 Euro d'Joer. D'Josiane Jacob huet dofir plädéiert, datt op d'mannst der aktueller Hausse vun den Energiepräisser beim Index misst Rechnung gedroe ginn.

Den Image vum Handwierk verbesseren

Et feelt massiv u Leit duerch all d'Secteure vum Handwierk. Den Defi ass, d'Leit an d'Handwierk ze kréien an net, fir se ze behalen, well d'Salairë wiere gutt a vill Employéë géinge gär a klenge Familljebetriber schaffen. Dacks léich et ënner anerem och un enger schlechter Orientéierung an der Schoul, sou den Tom Oberweis.

Et misst ee fort vum Image, dass ee just an d'Handwierk geet, wann een näischt kann, sou d'Josiane Jacob. An de leschte Jore goufen dofir schonn eng Rei Initiative geholl, wéi zum Beispill „Hello Handwierk", wou an der Primärschoul scho fir d'Handwierk sensibiliséiert gëtt. Donieft misst een och um Classique d'Méiglechkeet kréien, een dualen Ofschloss ze maachen, esou d'Patronne. De Paul Nathan erkläert, dass een am Bausecteur ëmmer verwinnt war iwwer déi lescht Joerzéngte mat gutt qualifizéierte Leit a gudden „Schafferten" aus Italien, Portugal oder Balkan. Mëttlerweil wär et awer manner attraktiv, fir op Lëtzebuerg ze kommen. D'Paie wären gutt, mä mat den héije Liewenskäschten, virun allem de Logementspräisser, géing duerno net vill vum Salaire iwwereg bleiwen. All Secteur wier anescht, ma besonnesch am Bau wier d'Demande héich, fir dierfe méi ze schaffen an net manner. Et wier gutt, wann de Staat manner Contraintë géing setzen, sou den Directeur technique vun enger Bauentreprise.

Background am Gespréich vum 19. Mäerz 2022

"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU an um RTL Play zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.