E Samschdeg waren de Claude Haagen, de Christian Wester an de Luc Emering eis Invitéen an der Emissioun Background am Gespréich um Radio.

An der Emissioun Background huet sech e Samschdeg alles ëm d‘Landwirtschaft gedréint. Invitéë waren: de Landwirtschaftsminister Claude Haagen, de President vun der Bauerenzentral Christian Wester an de Luc Emering, President vun der Landjugend a Jongbaueren.

Et si speziell Zäite fir d‘Baueren. No der Covid-Kris koum d‘Ukrain-Kris a parallel d‘Inflatioun. Direkt Echangë mat Russland an der Ukrain gouf et der zwar net vill, ma d‘Lëtzebuerger Bauere sinn awer mat de generelle Konsequenze gehäit. De Krich huet d‘Produktiounskäschten nach méi deier gemaach.

Lëtzebuerg wier ofhängeg bei verschiddene Fuddermëttel an do wieren zum Beispill beim Eewäisskonzentrat d‘Präisser bis ëm dat véierfacht geklommen, sou de Luc Emering.

De Christian Wester huet fir säin Deel d‘Energiekäschte virgerechent. Wann hien a sengem Betrib pro Joer 30.000 Liter Masutt verbraucht, da kascht deen elo ganz einfach dat duebelt, ouni datt ee soss eppes dovunner huet.

D‘Betriber, déi alles misste virfinanzéieren, kéimen och net derlaanscht, déi Käschte lues a lues un de Konsument weiderzeginn, sou de Christian Wester.

Dee Konsument muss op alle Fall an Zukunft bereet sinn, méi Suen auszegi fir Liewensmëttel a virun allem fir qualitativ Liewensmëttel, sou de Luc Emering, fir dee mer manner ofhängeg vum Ausland misste ginn. Lëtzebuerg sollt sech an deene Beräicher, wou mer net genuch produzéieren, besser opstellen, zum Beispill beim Geméis an Uebst. Leider wieren déi administrativ Obstakelen heiansdo grouss, wann ee sech nei wéilt ausriichten, sou de President vun der Landjugend a Jongbaueren. De Landwirtschaftsminister Haagen huet op där Plaz wësse gedoen, datt de Problem bekannt ass an datt dru geschafft gëtt.

D‘Liewensmëttelsécherheet an Europa zu Lëtzebuerg wier garantéiert, sou nach den LSAP-Minister Claude Haagen. Leider kéinten déi grouss Verléierer vum Krich déi aarm Länner ginn.

Wat d‘national Betriber ugeet, wiere jo schonn eng Partie Aiden decidéiert, respektiv an der Maach.

Background am Gespréich vum 2. Abrëll 2022

"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU an um RTL Play zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.