E Samschdeg waren d'Presidente vum OGBL, LCGB an der UEL eis Invitéen an der Emissioun Background am Gespréich um Radio.

Index, Steieren, Paie versus Kapital - et war Klassekampf e Samschdeg de Mëtteg am Background hei op RTL. Mat vill Sträit tëscht dem OGBL an der UEL. D'Presidentin vum OGBL Nora Back sot, et wier gelunn, wann ee behaapte géing, d'Verréckele vun enger Indextranche am August géing mat de Steierkreditter iwwerkompenséiert ginn. "Haalt dach op, de Leit ze soen, se géinge léien!", huet de President vun der Union des entreprises Michel Reckinger sech opgereegt. Béid hu sech am zweeten Deel vun der Emissioun weider géigesäiteg Virwërf gemaach an ënnerstallt, op diversen Aart a Weisen "infekt" ze sinn.

Nora Back a Michel Reckinger am hëtzegen Echange

D'Nora Back huet de Refus vum OGBL, den Accord vun der Tripartite z'ënnerschreiwen, esou gerechtfäerdegt, well eleng iwwert den Index geschwat gi wier. De Michel Reckinger sot, datt d'Betriber duerch d'Hausse vun den Energiepräisser an d'Inflatioun awer immens impaktéiert gi wieren. D'Käschte vun de Betriber, dat si Matièren a Salairen. Wann dann d'Salairen och nach explodéiert wieren, dann hätten déi allermeescht Betriber Problemer gehat fir ze iwwerliewen. Dräi Indextranchen bannent engem Joer wären net ze packen. Dofir géing hien net verstoen, dass den OGBL elo op d‘Strooss wëll goen. Dem Michel Reckinger no ass dat e Klassekampf.

Firwat den OBGL refuséiert huet

D'Nora Back huet kritiséiert, bei der Tripartite wier net tëscht Betriber differenzéiert ginn, déi tatsächlech leiden oder Profitter maachen. De Michel Reckinger huet d'Profitter vun de Banken awer verdeedegt, well se wieren d'Mëllechkou, fir de Sozialstaat ze finanzéieren.

De Patrick Dury, President vum LCGB, och an der Ronn dobäi, mä manner op Sträit aus, huet déi Analys gedeelt. Seng Gewerkschaft hätt hiert Zil bei der Tripartite erreecht, well den Index wier net a Fro gestallt. Hien deelt och d'Argumenter vum Patronat, dass et ville Betriber net gutt geet. D'Indextranche vun August géing just verréckelt ginn an et wier fir d'éischt, datt Steierkreditter als Kompensatiounsmesurë virgesi sinn.

Patrick Dury vum LCGB gesäit den Index als geséchert

D'Analyse sinn dann och ausernee gaange bei der Fro vun den Ongläichheeten: de Michel Reckinger sot, den Index géing déi verschäerfen. D'Nora Back sot, fir géint Ongläichheeten ze goen, misst een iwwert d'Hausse vun de niddrege Paien an iwwert d'Steiere fueren. Och de Patrick Dury huet den Index, Garant vum soziale Fridden, verdeedegt. Hie sot awer och, datt weider Diskussiounen néideg sinn. Hien hat d'Schlusswuert: zu Lëtzebuerg si mer all zesummen an engem Boot.

Background am Gespréich vum 16. Abrëll 2022

"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU an um RTL Play zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.