E Samschdeg war d'Finanzministesch eis Invitée an der Emissioun Background am Gespréich um Radio.

D’Mesurë vun der Tripartite si geduecht, fir an enger Kris "puer Méint z’iwwerbrécken", dat huet d’Finanzministesch Yuriko Backes de e Samschdeg de Mëtteg am Background hei op RTL deklaréiert. Strukturell Ännerungen, notamment bei de Steieren, dat kéint een net elo wärend enger Kris ugoen. Ugeschwat op déi "kämpferesch" Maniff vum OGBL e Sonndeg an der Stad, sot d’Yuriko Backes, et misst een éierlech mat de Leit sinn. D’DP-Politikerin huet insistéiert, et wier einfach net wouer, datt d’Leit mam Accord u Kafkraaft géinge verléieren. De Kampf-Langage vum onofhängege Gewerkschaftsbond wier an hiren Aen net de richtegen. Et misst een dovun ewechkommen an zesummen als Gesellschaft no Léisunge fir déi vill Defië sichen, mat deenen eist Land ze dinn hätt.

Background am Gespréich: Yuriko Backes

Effektiv profitéieren all d’Betriber vum Verréckele vum Index am Sënn vun der "Previsibilitéit", sou d’Yuriko Backes op d’Kritik vum OGBL, datt Leit nëmmen zum Deel gehollef kréichen, d’Betriber awer all, onofhängeg dovunner, ob se Profitter maachen oder net. D’Finanzministesch huet awer betount, et wier falsch ze soen, et géing ee mat der Géisskan iwwert d’Betriber fueren, well et och eng Rei Hëllefsmesürë gëtt, déi ebe grad geziilt just deene Betriber zegutt kommen, déi wéinst der Hausse vun den Energiepräisser Pertë maachen. D’Yuriko Backes huet och d’Kritik ofgewiert, datt de Banken Dividenden ausbezuelt gëtt, iwwerdeems den Index moduléiert gëtt: déi Betriber deenen et gutt geet, géinge jo Steiere bezuelen an d’Hallschent vun den Ausgabe vum Staat, déi Sozial-Mesurë sinn, misste jo mat Geld finanzéiert ginn, wat vun "iergendzwousch" kënnt.

Eng Upassung vun de Steiertabellen un d'Präisdeierecht dann, déi vill Leit wéi d’Gewerkschaften, d’CSV an aner Parteie verlaangen, misst awer nach waarden. D’Yuriko Backes sot, de Sputt fir eng grouss Steierreform wier net do, well déi all Joer minimum 500 Milliounen Euro dem Staat géing kaschten. Ugeschwat op eng Hausse vum Spëtzesteiersaz, fir déi Perte ze neutraliséieren, sot d’Yuriko Backes, a Krisenzäite wier et net de Moment fir Steieren erof- oder eropzesetzen. Dat selwecht gëllt, wat d’Besteierung vu Kapital ugeet: och hei misst een de groussen ugekënnegte Chamber-Debat iwwert d’Steieren ofwaarden, ausser wat d’Grondsteierreform ugeet, déi nach ëmmer soll am Hierscht als Projet präsentéiert ginn.

D’Finanzministesch huet awer betount, si géing an den nächste Méint kucken, wat ee kéint méi fir elengerzéiend Leit maachen.

Responsabel an éierlech a Krisenzäiten an dono. Appell un den OGBL: d’Gewerkschaft soll bei der Wouerecht bleiwen!

D’Regierung ass prett a Saache Logement Neel mat Käpp ze maachen. Leerstandsteier, Spekulatiounssteier a Grondsteier géifen am Hierscht op de Leescht geholl, well hei hätt een et mat engem anachronistesche System ze dinn. D’Yuriko Backes war Invitée am Background an huet vun der Politik vu muer kaum eppes verrode – déi haut wier Krisen-orientéiert an et wier elo net den Ament enger struktureller Diskussioun virzegräifen.

Background am Gespréich vum 30. Abrëll
Responsabel an éierlech a Krisenzäiten an dono. Appel un den OGBL: d’Gewerkschaft soll bei der Wouerecht bleiwen!

Wat der neier Finanzministesch net gefält, ass déi aktuell Kampfrhetorik – si plädéiert fir eng responsabel an éierlech Aart a Weis Politik ze maachen, sou d'Monique Kater a sengem Sujet am Journal.

E kämpfereschen 1. Mee, en intellektuelle Krawall, e Klassekampf…Ausdréck aus hirer 1. Tripartite, wärend hiren éischte Méint als Ministesch, Ausdréck, e Stil deen hir net gefält, scho guer net, wann et esouvill Defie géif, déi een am Dialog sollt ugoen.

D’Salariat géint de Staat, zwou Dammen, déi sech, esou schéngt et, net ganz kauscher sinn. An enger Krich- a Krisesituatioun wéi elo bräichten d’Entreprisë Previsibilitéit. An och d’Leit kee Verloscht vun der Kafkraaft. Den OGBL sollt bei der Wouerecht bleiwen, sou den Appell vun der Ministesch un d’Gewerkschaft.

A Krisenzäite géinge cibléiert a limitéiert Mesurë gëllen, déi strukturell Diskussioune kéimen dono. Ob Tankrabatt oder net vu Juli un, kéint een haut net soen. Och net, ob, wéini, wat a wéi eng Steierreform kéint kommen.

Et wier wichteg, dass mer eisen Triple A behalen, als Land. Fir sech selwer leet déi fréier Cheffin vum Lëtzebuerger Büro vun der EU-Kommissioun an dono Maréchale de la Cour déi politesch Lat zimmlech héich: responsabel an éierlech Politik maachen, an dat a Relatioun mat der Realitéit vun haut. Op de muer ugesprach ass d’Äntwert: Loosst mech emol Finanzministesch sinn.

"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU an um RTL Play zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.