E Samschdeg war de Generaldirekter vu Luxembourg for Finance eisen Invité an der Emissioun Background am Gespréich um Radio.

D'timid Erhuelen no der Pandemie, déi d'Finanzplaz matgemaach huet, war net vu laanger Dauer, well d'Repercussioune vum Krich an der Ukrain nees all Wand aus de Seegele geholl huet.

Eng Zuel géif dëst illustréieren: sou sinn d'Avoiren op der Lëtzebuerger Fongeplaz vun 6 op 5,5 Billiounen Euro (5.500 Milliarden Euro) erofgaangen, dat huet natierlech en Impakt op d'Staatskeesen, well d'Recetten aus der Taxe d'abonnement erofginn. Dat sot de Generaldirekter vu "Luxembourg for Finance" e Samschdeg an der Emissioun Background.

Inflatioun als Fudder fir Populisten

Wéi den Nicolas Mackel weider sot, géif d'aktuell Situatioun vun héijer Inflatioun an Energie-Enkpäss him an der Finanzplaz Suerge maachen. D'Inflatiouns-Hausse géif d'Populisten an Europa fidderen, woubäi dann nees d'Finanzplazen, déi éischt Affer wieren.

Den Index bezeechent de Nicolas Mackel als Zort "helleg Kou", woubäi eist Land entretemps an der OECD dat Eenzegt mat engem automateschen Indexsystem wier - eppes, wat international Finanzgruppen ëmmer méi schwiereg an hire Siègen erkläert kréichen. Duerfir misst fir en Equiliber tëscht Index-Upassen, héije Steieren an der néideger Attraktivitéit vun der Finanzplaz gesuergt ginn, sou de CEO vun "Luxembourg for Finance".

Gramegna um Chef-Posten ESM

Datt den Ex-Finanzminister Gramegna lo wëll neie Chef vum Europäesche Stabilitéitsmécanissem ginn, gesäit den Nicolas Mackel positiv. Den DP-Politiker hätt dann och duerchaus gutt Chancen, fir an der Successioun vum Klaus Regling den ESM ze leeden - fir den Nicolas Mackel ass de Pierre Gramegna, deen ideale Mann op deem Posten an hätt all déi néideg Capacitéite fir deen Job.

Gouf Mackel als Successeur vu Gramegna gefrot?

D'Avoire vu russeschen Oligarchen op der Lëtzebuerger Finanzplaz bezeechent de Nicolas Mackel als marginal. Dëst wier en "Nebenkriegsschauplatz" - Suerge mécht iwwerdeem d'Energieofhängegkeet vu Russland.

Chinapolitik / Bistrotsgespréich - Nicolas Mackel

Och den Ëmgang mat China - trotz alle Kriticke vu Mënscherechtsaktivisten - misst gutt iwwerluecht sinn - e Stopp vun de Relatioune kéint ee sech net leeschten, sou de Chef vu "Luxembourg for Finance".

Suites vu Leaks iwwer LUX

D'Defie fir d'Finanzplaz schätzt de Luxembourg for Finance-Direkter als immens héich a besonnesch och well d'Oploen an d'héich Käschten de Banke géifen ze schafe maachen - mat weidere Fusiounen oder Consolidatioune wier deemno ze rechnen.

D'aktuell Steierlaascht fir d'Banke schätzt den Nicolas Mackel op ronn 18%.

De Logementsprobleem wier de Probleem Nummer 1 fir déi Jonk, absënns wann ee wéilt Talenter aus dem Ausland op Lëtzebuerg kréien. Fir den Nicolas Mackel wier d'Steierschrauf manner d'Léisung fir dee Probleem, well d'Offer u Wunnenge misst eropgesat ginn, ënnert anerem andeems méi héich gebaut gëtt.

D'Staatsschold, déi aktuell bei 26% vum PIB läit, muss dem Nicolas Mackel no bewosst am A behale ginn. Wann d'Limitt vun 30% areecht wier, kéint och den Triple A a Gefor geroden - dee Rating wier nach ëmmer d'Haaptverkafsargument am Ausland.

Background am Gespréich: Nicolas Mackel

"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU an um RTL Play zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.