E Samschdeg waren déi dräi Europadeputéiert eis Invitéen an der Emissioun Background am Gespréich um Radio.

D‘Unanimitéit muss fort. Et kéint net sinn, dass ee wéi de Viktor Orban d‘Agenda vun der ganzer Europäescher Unioun dominéiert. Dat ass e wichtege Constat, deen déi 3 Europadeputéiert Tilly Metz, Christophe Hansen a Marc Angel de Samschdeg de Mëtteg an eiser Emissioun Background am Gespréich gemaach hunn. Et goung do ënner anerem ëm de Fonctionnement vun der EU an dësem Krich, ëm den EU-Bäitrëttsstatus fir Kiew an ëm déi europäesch Energie- a Klimapolitik.

D‘EU géing sech schwächen, well een net aus engem Mond schwätzt an domat u Kredibilitéit verléiert, sou den LSAP-Europadeputéierte Marc Angel. Et dierft net sinn, dass ee Staatschef wéi den Orban déi aner 26 kann als Geisel huelen, fir seng Agenda duerchzesetzen, sou de Christophe Hansen vun der CSV. D‘Unanimitéit wier derbäi ze bréckelen, sou déi gréng Tilly Metz. Et hätt een et nämlech hikritt, nawell een Embargo duerchzesetzen, zwar mat Exceptiounen, mee trotzdeem.

Waffeliwwerungen an trotzdeem weiderhin op Diplomatie setzen

Mir sinn den Ament och an engem Informatiounskrich, sot déi gréng Europadeputéiert Tilly Metz. Si hätt wuel am Ufank e Problem gehat mat der Glorifizéierung vum Krich, mä et wier kloer, hei wier e Land attackéiert ginn an et misst een endlech zu engem Enn kommen. Wann een d'Diplomatie ofschreift, wier ee scho verluer, sot sengersäits den LSAP-Deputéierte Marc Angel. Déi hätt wuel den Ament versot, mä d'Diskussiounskanäl missten opbleiwen. De sozialistesche Politiker huet awer och d'Waffeliwwerungen un d'Ukrain verdeedegt. D'Ukrain géif net nëmme fir sech selwer, mä och fir eis Wäerter kämpfen.

Och déi Gréng Vertriederin am Europaparlament steet an dësem Fall zu de Waffeliwwerungen. Traditionell hunn déi Gréng jo éischter d‘Positioun vun de Pazifisten, mee hei wier eng Urgence.

Den CSV-Europadeputéierte Christophe Hansen huet gewarnt, Waffeliwwerunge wieren en zweeschneidegt Schwäert. Net nëmme géifen doduerch Mënsche stierwen, mä et wier och ze fäerten, datt europäesch Waffen duerno um Schwaarzmaart landen. Hien huet donieft och kritiséiert, dass d‘Staats- a Regierungscheffen eenzel mam Här Putin telefonéieren an dat mat groussem "Tam-Tam" géinge mediatiséieren. Dat géing net wéi eng gëeenten EU no baussen ausgesinn a besonnesch a Froe vun der Aussepolitik wier d‘EU dacks ze "behäbig", fir eng gemeinsa Positioun ze fannen. An do misst drun geschafft ginn. De Christophe Hansen fënnt och, dass et eng staark europäesch Verdeedegungspolitik an eng staark Arméi brauch, déi virun allem ofschreckend soll wierken an och net misst agesat ginn.

Et géing awer elo schonn immens vill an d‘Verdeedegung investéiert ginn, sou d‘Tilly Metz. Dofir dierft ee elo net a Panik verfale bei der Oprëschtung. Et misst een einfach besser kooperéieren an enger Inter-Operabilitéit erméiglechen.

Fir de Marc Angel läit de gréisste Problem doranner, datt d'Memberstaate mat x verschiddene Systemer schaffen an d'Koordinatioun no 10 Joer nach ëmmer net déi ass, déi se misst sinn.

Wéi stinn déi dräi Parteien zu den EU-Bäitrëttsfuerderunge vun der Ukrain?

D'CSV ass derfir, datt d'Ukrain sou séier wéi méiglech Perspektive fir en EU-Bäitrëtt kritt. Dem Xavier Bettel huet de Christophe Hansen an dëser Fro Passivitéit reprochéiert. Hien hätt sech misse méi staark hannert e Bäitrëtt vun der Ukrain stellen. Et sollt alles schéin der Rei no goen, sot d'Tilly Metz vun déi Gréng. D'Ukrain sollt trotz alle Perspektiven, déi ee wéilt ginn, net de rouden Teppech ausgerullt kréien. Dem Marc Angel no wier et virun allem wichteg, fir der Ukrain de Statut vum Bäitrëttskandidat séier unzëerkennen. An da misste se natierlech d‘Kopenhagener Krittären erfëllen.

Energie-Ofhängegkeet: Jorelaang falsch Politik

Et hätt ee jorelaang falsch Politik gemaach an et wier een naiv gewiescht, sou erkläert de Marc Angel déi héich Energie-Ofhängegkeet an der EU vu Russland. Virun allem misst elo och déi energetesch Transitioun acceleréiert ginn an et misst ee méi Energie-effizient ginn an och esou méi aspueren.

Et wier méiglech, laangfristeg onofhängeg vu Russland ze ginn, mee aktuell wieren déi russesch fossil Energien einfach déi Bëllegst, erkläert de Christophe Hansen. Donieft wiere Feeler geschitt wéi zum Beispill, dass Däitschland verfréit aus der Atompolitik erausgeklomme wier an esou vill méi ofhängeg gewiescht wier vu Gas a Pëtrol aus dem Ausland. Donieft wier et generell e Problem a souguer geféierlech, dass d‘EU a ville wichtegen Domainer, och an der Medezin, ofhängeg wier vu Produktiounen, déi ausserhalb vun der EU gemaach ginn. Iwwer 90 Prozent vun den Antibioticken ginn zum Beispill a China produzéiert.

Flësseggas aus den USA importéieren, géif vun engem ekologesche Standpunkt hier sécher wéidoen an dierft och just fir eng kuerz Zäit gëllen, sou d'Tilly Metz vun déi Gréng. Et dierft een awer och net hypokritesch sinn a sech bewosst sinn, wou de Bensin hierkënnt, mat deem eis Autoe fueren. Mee laangfristeg misst een onbedéngt an d‘erneierbar Energien investéieren.

Optimistesch hu sech d'Invitéeë gewisen, datt d'Europaparlament der EU-Kommissioun hir Pläng bei der Taxonomie, mat där indirekt Atomenergie a Gas als nohalteg Energië géifen unerkannt ginn, nach gekippt kritt.

Background am Gespréich vum 4. Juni 2022

"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU an um RTL Play zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.