E Samschdeg ware 4 Buergermeeschteren eis Invitéen an der Emissioun Background am Gespréich um Radio.

D'Gemengepolitik war e Samschdeg de Sujet am RTL-Background. Invitéiert waren eng Buergermeeschtesch an dräi  Buergermeeschteren: D'Manon Bei-Roller vun Dippech, den Thierry Lagoda vu Biekerech, de Michel Malherbe vu Miersch an den Emile Eicher vu Klierf, dee jo och President vum Gemengesyndicat Syvicol ass.

Alle 4 ginn d'nächst Joer mat an d'Gemengewalen. Den Ament wier een am Gaangen d'Lëschten zesummenzestellen, wat keen einfachen Exercice wier. Et wier nämlech ëmmer méi schwéier Leit ze fannen, déi Politik wëlle maachen.

D'Zuel vun den Auslänner an de Gemengen hellt ëmmer weider zou. De Gemengesyndikat Syvicol wëll dowéinst eng Rei Campagnë lancéieren, fir och si ze motivéieren, sech an der Gemengepolitik ze engagéieren.

E weidere Sujet waren déi duebel Mandater.

Den CSV-Député-maire Emlie Eicher sot, et wier effektiv schwéier béides ze maachen. D'Famill géif och drënner leiden. Dowéinst hätt een och scho gefrot, de Congé politique erop ze setzen, ënner anerem och fir, datt d'Leit aus der Privatwirtschaft Politik kënne maachen.

Positiv wier awer, datt een als Deputéierte gutt iwwert d'Parlaments- a Regierungsaarbecht informéiert wier. Gläichzäiteg hätt een als Buergermeeschter méi Versteesdemech fir déi kommunal Suergen, wat wichteg wier an der Chamber.

Als Buergermeeschter bräicht ee breet Schëlleren jo, ma et géif een awer nach ëmmer de Respekt an de Merci vun de Leit spieren, wann ee sech fir seng Gemeng asetzt.

Bedauert gouf, datt sech ëmmer manner Leit an de Veräiner engagéieren. Eng Situatioun, déi duerch d'Pandemie méi schlëmm gi wier.

Och d'Gemenge si mat der héijer Inflatioun geplot. Vill Gemengeprojete kéinten den Ament net ëmgesat ginn, well d'Präisser vun der Matière Première esou staark geklomme sinn.

An och fir déi sozial méi schwaach Stéit ze ënnerstëtzen, géif en ëmmer méi groussen Challenge an deem Kontext ginn.

Background am Gespréich: Thema Gemengepolitik

"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU an um RTL Play zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.