E Samschdeg war den Educatiounsminister eisen Invité an der Emissioun Background am Gespréich um Radio.

Background am Gespréich: Claude Meisch

Nieft der Gratuitéit vun de Maison Relais an der Schoulzäit soll och fir d'Rentrée am September déi flächendeckend Hausaufgabenhëllef an der Grondschoul ulafen. Dat sot e Samschdeg an der Mëttesstonn den Educatiounsminister Claude Meisch an der Emissioun Background am Gespréich. Dem Minister no sollen d'Kanner hir Hausaufgaben an der Maison Relais da maachen. D'Personal géif heifir och forméiert ginn. En zweete Cours oder Appui soll et awer net sinn.

De Claude Meisch huet annoncéiert, datt de Modell vun de Quereinsteiger, deen dëst Joer ausleeft, weidergefouert an adaptéiert gëtt. An Zukunft musse Persounen, déi duerch hire Bachelor a Fro kommen, ee Joer Formatioun op der Uni maachen ier se Schoul hale kënnen. Parallel wier de Minister a Gespréicher mat der Uni Lëtzebuerg fir datt pro Joer méi Jonker als Enseignant forméiert kënne ginn. Den Ament bilt d'Uni grad mol ronn en Drëttel vum Léierpersonal aus, dat gebraucht gëtt. Déi 100 Plazen aktuell sollen "däitlech" eropgoen. Ëm wéi vill genee sot de Claude Meisch net. Geschwë soll awer an deem Sënn eng Konventioun ënnerschriwwe ginn.

De Minister sot sech da beonrouegt iwwer rezent Gewaltphenomener an der Schoul, speziell am Lycée. Hien hätt Biller gesinn, déi och den Tour op de soziale Reseaue maachen, wou Jonker zerschloe ginn, sou de Claude Meisch.
Dat géing net goen, do géing disziplinaresch reagéiert ginn an och d'Justiz géing doropper schaffen.

Keng parallel Schoulwelten, esou de Minister

Vum geplangte Pilotprojet a véier Grondschoule fir op Franséisch alphabetiséiert ze ginn erwaart sech de Claude Meisch interessant Erkenntnisser. Dee Projet géif wëssenschaftlech begleet ginn a soll fir unzefänken ee ganze Parcours bis de Cycle 4.2 ofdecken, ier e generaliséiert gëtt. D'Alphabetiséierung op Franséisch war am Koalitiounsaccord net virgesinn a gouf och net mam Terrain virdrun ofgeschwat. Dem Claude Meisch no hätt een déi lescht 30 Joer driwwer geschwat elo wier et un der Zäit gewiescht eppes ze maachen.

Fir de Rescht huet sech den DP-Minister géint de Reproche gewiert mat den ëffentlechen Europaschoule parallel Schoulwelte geschaaft ze hunn. Bei der Informatioun misst een awer nach eng Schëpp bäileeën. Datt och wierklech déi Kanner, déi et am meeschte brauchen, an dësem méi flexibele Sproochekader encadréiert kënne ginn. De Ministère géif awer elo schonn den Direktioune beim Profil vun de Schüler iwwert d'Fanger kucken. De Claude Meisch huet d'Hoffnung, datt sech déi regulär ëffentlech Schoul vu verschiddenen Aspekter vun der International School inspiréiere loossen. Weider ëffentlech Europaschoule sinn nach um Belval an zu Diddeleng am Gespréich.

E Sujet an der Emissioun waren och Kanner mat spezifesche Besoinen. E Reproche dee vum Terrain ëmmer rëm kënnt ass deen datt d'Hëllef ze schwéierfälleg ass an ze laang op sech waarde léisst.

Den Taux vu Kanner, déi a spezialiséierten Zenteren orientéiert ginn, wier erof gaangen. Op deem Punkt hätt d'Politik also zum Deel Ziler erreecht, sou de Minister. De Claude Meisch huet awer zouginn datt et Schwaachstelle gëtt.
Ënner anerem bei de Prozedure géif et Verbesserungspotential, zum Beispill bei de Kommunikatiounsweeër.

Ugeschwat op seng politesch Ambitioune sot de Claude Meisch hie géif d'nächst Joer mat an d'Chamberwale goen, wa seng Partei e wéilt. Ambitiounen op Gemengenniveau hätt hie keng. De liberale Minister huet et gemengt et wier sécher gutt wa grad am Bildungsberäich eng gewësse Kontinuitéit assuréiert ass. Bildungsreforme géifen Zäit brauchen. Op der anerer Säit wieren zwou Mandatsperioden als Educatiounsminister dach eng laang Zäit.

"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU an um RTL Play zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.