E Samschdeg war de fréiere Lëtzebuerger Premier eisen Invité an der Emissioun Background am Gespréich um Radio.

De Krich an der Ukrain ass en Drama, deen d'Relatioune mat Russland an eng Atmosphär vum kale Krich setzt. Datt d'Ukrain lo offiziell de Statut vum EU-Bäitrëttskandidat krut, wier komplett ze verstoen. En anert Signal hätt een den Ukrainer zu dësem Ament net kéinte ginn - et dierft Een awer elo net d'Illusioun ginn, datt dëst en einfache a séiere Wee wier - au contraire. Dat sot de fréieren EU-Kommissiounspresident Jean-Claude Juncker e Samschdeg de Mëtteg an der Emissioun Background am Gespréich.

Jean-Claude Juncker iwwert d'Oprëschtung

Datt de fréiere Finanzminister elo wëll Chef vum ESM ginn, versteet de Jean-Claude Juncker net ganz richteg. Et wier en Job, dee mat vill Reesen an Responsabilitéit verbonne wier, also de contraire zu deem, wat de Pierre Gramegna bei sengem Depart als Minister annoncéiert hat.

Jean-Claude Juncker iwwert de Pierre Gramegna

De Logementsprobleem an déi iwwerdeiert Präisser vun Terraine misst mat e puer Zaangen ugepaakt ginn, sou de fréiere Staatsminister, deem no misst ënner anerem d'Grondsteier substantiell gehéicht ginn. Allemol wier de Logementsprobleem fir de Jean-Claude Juncker seng gréisst eegen Defaite.

Déi sozial Kohesioun, d'Finanzen an de Logement si fir de fréiere Staatsminister d'Themen, déi d'Walcampagne wuel bestëmme géifen.

Jean-Claude Juncker iwwert de Logement

D'Tripartite wier an den Ae vum Ex-Staatsminister ze spéit beienee komm, dat wier vläicht och eng Erklärung fir dat "holperegt" Enn, andeems den OGBL seng Ënnerschrëft net ënnert den Accord gesat huet. Eng Index-Modulatioun wier awer vertrietbar, fir besonnesch kleng Betriber net an d'Faillite ze dreiwen, sou de Jean-Claude Juncker bei eis um Radio.

Jean-Claude Jucker iwwert d'Tripartite

Och haut géif de Jean-Claude Juncker nach emol an d'CSV goen, wëll dëst e Bekennen zu engem Mënschebild wier, datt him géif entspriechen: d'kathoulesch Sozialléier, ouni "pafeg" ze sinn. D'CSV wier a kenger gudder Form aktuell a géif e neien Depart woen - dat fënnt d'Zoustëmmung vum CSV-Member, deem no nach weider mat senger Partei ze rechne wier. Et géifen dann och weider Volleksparteie gebraucht ginn, d'CSV misst allerdéngs zu hiren ale Valeuren zeréckfannen.

Jean-Claude Juncker iwwert d'CSV

Mat an d'Wale goe wëll den Jean-Claude Juncker iwwerdeem net méi, d'Stëmmung am Land den Ament wier awer éischter favorabel fir méi kleng Parteien.

Jean-Claude Juncker iwwert e méigleche Comeback

Dem fréieren CSV-President Frank Engel, deen d'Partei verlooss huet, fir FOKUS ze grënnen, kräischt de Jean-Claude Juncker iwwerdeem net no. Hien hätt no enger Deceptioun bannent der Partei d'Bengelen ze séier bei d'Tromm gehäit.

Background am Gespréich - Jean-Claude Juncker

"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU an um RTL Play zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.