E Samschdeg war déi aktuell Justizministesch eis Invitée an der Emissioun Background am Gespréich um Radio.

Rezent Nouvellen iwwer Gewalt an der Schoul oder am Prisong gi ganz eescht geholl. Dat sot d’Justizministesch Sam Tanson am Background hei op RTL. Alles an allem géing een eng Hausse vun den Affaire feststellen, déi beim Parquet traitéiert ginn. Dat kéint awer och positiv sinn, well et dorobber kéint zeréckzeféiere sinn, datt méi Fäll gemellt ginn: "Well Dir sot zurecht: ‘Gewalt gouf et an der Gesellschaft nach ëmmer’. Et ass ebe just esou, datt onsen Toleranzniveau vis-à-vis vun der Gewalt vill méi kleng ginn ass", sou d’Sam Tanson. Op d’Fro ob een net soll méi streng mat Täter sinn, huet d’Justizministesch virop gesot, si géing net mengen, datt a Länner wou et nach zum Beispill d’Doudesstrof gëtt, keng Gewalt géing ginn. Mee si sot och: "ech hu jo, mengen ech, net gesot, et soll een net och streng sinn". Et géing awer scho Strofe ginn an et géing een d’Strofen och net ofschafen. Mee et géing ee kloer Reegelen dra schreiwen a fir Mannerjäreger géinge Strofen hallwéiert ginn. Mannerjäreger wieren nämlech nach net um Enn vun hirem Developpement ukomm a stroffälleg Mannerjäreger hätten dacks e schwéiere Vécu hannert sech.

E schwéiere Vécu, deels mat Trauma, hunn déi Prisonéier, déi Giischtercher dës Woch am Prisong attackéiert a menacéiert hunn. D’Ministesch sot, et géing sech ëm Jonker handelen, déi ouni Elteren hei an d’Land kommen. Well se keng Pabeieren hätten, géing medezinesch den Alter geschat ginn op eng «Fourchette» tëscht 17 an 20 Joer oder 16 a 19 Joer. D’Sam Tanson huet betount, et wier bei wäitem net all Mineur non-accompagné e Kriminellen. Si huet awer och matgedeelt, datt nei Mesuren op d’Been gesat ginn fir de Giischtercher et z’erlaben, sech besser kënnen ze wieren. Tréinegas a Matraquen kënne méi generell zur Verfügung gestallt ginn.

De Problem wier awer vill méi «global» an et kéint een net just soen, et hätt een e Gewaltproblem. Et misst een déi Jonk esou stäerken, fir hinnen all d’Moyenen ze ginn, datt en net an déi Situatioune geréit. Dat géing der Justizministesch no op ville Niveauen geschéien. Sief et bei der Preventioun oder bei der Opklärung. D’Sam Tanson huet op Beesecure higewisen oder nach zousätzlech Psychologen an Educateuren a Campagnen vun der Police an de Schoulen.

Si huet och nach emol d’Reform vum Jugendschutz an d’Trennung vum Jugendstrofrecht vum Jugendschutz erkläert. Et géing ee probéieren, beim Jugendstrofrecht den Accent op d’"Mesures de diversion" ze setzen. Iert een an de Centre socio-educatif oder souguer d’Sécherheetsunitéit op Dräibuer kéim, géing et Aarbecht am Interessi vun der Allgemengheet ginn, oder nach Therapien an aner Alternativen. De Prisong wier eng Alternativ "ganz um Wupp vum System".

Background am Gespréich: Sam Tanson

"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU an um RTL Play zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.