En Donneschdeg de Moie konnt Dir eis op RTL Radio Lëtzebuerg Är Meenung soen an Är Froe stellen.

Och wann een ouni Rendez-vous kann an den Impfzenter, et soll een d'Invitatioun fir seng Booster-Impfung ofwaarden, well et wier organisatoresch méi einfach. Dat sot de Santésdirekter, den Dr. Jean-Claude Schmit, en Donneschdeg de Moien am RTL "Dir hutt d'Wuert". Dir konnt uruffen an är Froe stellen, iwwert de Virus an d’Impfungen.

Den Direkter vun der Santé huet den Appell gemaach, fir onbedéngt vun der drëtter Impfung ze profitéieren, well d'Impfen hëlleft, och wann eng drëtt Impfung keen honnertprozentegen Schutz wier. Dowéinst wier et wichteg, aner Mesurë wéi Masken an Distanz bäizebehalen, respektiv nees ze verschäerfen, wann d'Infektiounszuele weider erop ginn.

Virun engem Familljefest zum Beispill wier et sënnvoll, datt jidderee virdrun e Schnelltest mécht.

Et sollt ee sech och net ze vill op d'Antikierper konzentréieren. Dat sollt een am beschte vergiessen, mengt den Dr. Schmit.
Antikierper wieren nëmmen en Deel vun der Immunitéit. Dowéinst sollt ee sech do keng grouss Suergen oder Gedanke maachen.

Datt een net an all Land mat sengem Lëtzebuerger Covid-Check era kënnt, wier e Probleem vum Codage, dee jee no Land ka variéieren. Hei géif dru geschafft ginn. Et sollt een am beschten och de Pabeierscertificat derbäi hunn.

Och den iwwerlaaschten Contact-Tracing an d'Hotline vun der Santé waren e Sujet an der Emissioun Dir hutt d'Wuert mam Santésdirekter: Douane an Arméi an aner Administratioune sollen elo mat Personal hëllefen d'Helpline ze entlaaschten.

40 Leit schaffen aktuell op der Hotline, déi kënnen eng 1.500 bis 2.000 Appeller den Dag traitéieren. En Dënschdeg zum Beispill hätten awer 7.000 Leit ugeruff, déi kéint een net all entgéint huelen. D’Personal géif awer elo opgestockt ginn.

Et war awer och den Appell un d’Leit just op d’Hotline unzeruffen, wann et wierklech néideg ass. Fir e Rendez-vous online ze huelen sollt ee sech vun engem aus der Famill oder dem Frëndeskrees hëllefe loossen.

Déi europäesch Medikamentenagence EMA gëtt dësen Donneschdeg hiren Avis, ob de Biontech/Pfizer-Vaccin fir Kanner tëscht 5 an 11 Joer zougelooss gëtt. Wann de Feu-vert do ass, kéinten den 20. Dezember éischt Kannerdosie fir Europa geliwwert ginn. 18.000 dierften dat der fir Lëtzebuegg an enger 1. Liwwerung sinn. An der Chrëschtvakanz kéinten also déi éischt Kanner ënner 12 Joer zu Lëtzebuerg geimpft ginn.

Dir hutt d'Wuert mam Dr. Jean-Claude Schmit