E Mëttwoch de Moie konnt Dir eis live op RTL Radio Lëtzebuerg Är Meenung soen an Är Froe ronderëm den Ukrain-Krich stellen.

Angscht, datt de Krich bis hei an d'Land kéim oder virun engem Atomkrich, misst een net hunn, et wier een duerch d'EU an d'NATO protegéiert an dat géif ofschrecken. De Wladimir Putin wier sech nämlech bewosst, wat d'Konsequenzen dovunner wieren. Dat sot de Vizepremier an Arméisminister François Bausch e Mëttwoch de Mueren am "RTL-Dir hutt d'Wuert" iwwert den Ukrain-Krich.

D'Sanktioune géint Russland hätten och en Impakt op d'Lëtzebuerger Ekonomie, zum Beispill misst d'Cargolux Ëmweeër fléien an d'Lëtzebuerger Finanzplaz géif och drënner leiden. Déi militäresch an humanitär Hëllef huet dann natierlech och hire Präis, mä dat misst et eis wäert sinn, seet de Minister.

Esou Aggressiounskricher dierften et net méi am 21. Joerhonnert ginn. Et hätt een och nach Sputt, fir weider Sanktiounen an och hei am Land misst een iwwer weider Strofmesurë kënnen nodenken, ouni awer all Russ als Krichs- a Putin-Supporter ze verurteelen.

Weider präziséiert de Minister, datt de Lëtzebuerger Militärbudget weider héich gehale misst ginn. Duerch den Ukrain-Krich wier de politeschen Encouragement elo dofir do. An dat begréisst de gréngen Arméisminister.

Als klengt Land misst ee solidaresch si mat den EU- an den NATO-Partner. Et wier awer wichteg, e Support ze liwweren, dee Sënn mécht. Dowéinst wéilt een zum Beispill och e Belsch-Lëtzebuerger Batailloun opbauen.

Een Thema, wat vill Leit duerch de Krich an der Ukrain an d'Sanktioune géint Russland beschäftegt, ass d'Energieversuergen. Déi wier fir de Grand-Duché ofgeséchert, verséchert de Minister, d'Präisser kéinten awer weider klammen. Dofir goufe jo rezent och staatleche Hëllefen annoncéiert. Dernieft wier et eng Chance, fir eng Onofhängegkeet vu fossillen Energien ze erreechen.

Demande vun der Ukrain, fir an d'EU an fir d'NATO, géif ganz eescht geholl ginn. Ma hei dierft een näischt iwwerstierzen. Et misst genee gekuckt ginn, ob all d'Krittären erfëllt sinn. An de Krich hätt esou och net kënnen evitéiert ginn, mengt de François Bausch. Deen och ënnerstrach huet, datt een de Konflikt net dierft martialesch eropspillen. Dowéinst géif och weiderhi probéiert ginn, fir eng diplomatesch Léisung ze fannen.

An engem Krich, wéi deen an der Ukrain, wier Material liwweren och no internationalem Recht erlaabt, Truppe schécken dogéint awer net. An et wéilt ee sech am Géigesaz zu Russland un déi international Reegelen halen.

Wat Flüchtlingen ugeet, do wäert den Aussen- an Immigratiounsminister Jean Asselborn an den nächsten Deeg Detailer ginn, wéi Privatleit ukrainesche Flüchtlinge kënnen hëllefen.

Replay: Dir hutt d'Wuert mam François Bausch
Dir hutt d'Wuert "Ukrain-Krich" (Resumé)
E Mëttwoch de Moie konnt Dir eis live op RTL Radio Lëtzebuerg Är Meenung soen an Är Froe ronderëm den Ukrain-Krich stellen.