En Donneschdeg de Moie war de President vum Syvicol eisen Invité vun der Redaktioun.

"Fir eis ass de Projet an där Form vum Dësch.“ Dat sot den Emile Eicher en Donneschdeg de Moien als eisen Invité vun der Redaktioun.

De President vum Gemenge-Syndikat Syvicol a vum regionale Syndikat Sicler fënnt, dass de Projet vun enger Holzverbrennungsanlag zu Lenzweiler ze vill Problemer an ongekläerte Froen géif mat sech bréngen.

Als Sicler hätt een net wëlles d’Terrainen ze verginn, déi souwisou deels an enger Zone verte leien, oder an engem Beräich wou de Buedem opgetippt gouf, an d’Statik fir eng grouss Hal do souwisou net géif matspillen.

De Syvicol wëll am Hierscht iwwerdeems en Avis ofginn, zu den Duebel-Mandater an der Politik. Déi suergen jo den Ament bei eenzelne Projeten wéi der Jughurtsfabréck zu Beetebuerg oder dem Google-Datazenter, fir Polemik. Et wier kloer, dass wann ee méi Hitt unhätt, dass dat dann och mol zu Problemer kéint féieren, sou den Emile Eicher.

Wichteg wier et bei grad deenen zwee Projeten awer, dass d’Transparenz an d’Kommunikatioun tëscht dem Staat an de Gemengen, also de Bierger permanent misst dominéieren.

AUDIO: Invité vun der Redaktioun: Emile Eicher

Rendez-vous fir den Interview mam Invité vun der Redaktioun all Dag vu méindes bis freides kuerz no 8 Auer op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.