En Donneschdeg de Moie war den nei designéierte Wirtschaftsminister eisen Invité vun der Redaktioun.

Mir sinn zu Lëtzebuerg ze vill op de Wirtschaftswuesstem fixéiert a verléieren heiansdo aus den Aen, datt d'Leit och ënnert deem Wuesstem leiden. Dat sot den designéierten LSAP-Wirtschafts- a  Kooperatiounsminister Franz Fayot en Donneschdeg de Moien am RTL-Interview. Hautdesdaags misst ee kucke wéi mer eis Ekonomie an Zäite vu Klimaschutz, Nohaltegkeet a Biodiversitéit opstellen. Dat géif och am Koalitiounsaccord stoen a géif och haut scho gemaach ginn. An awer wier en neien Impuls néideg, beim qualitative Wuesstem an dem Rifkin-Prozess. Déi wéilt hien och ginn, sou eisen Invité vun der Redaktioun.

De Franz Fayot huet dem Etienne Schneider säi Bilan als Wirtschaftsminister gelueft. Dee géif sech wierklech weise loossen. Mä et hätten eng Rei Projete wéi Fage, Knauf a Google d'Fro opgeworf, wat nach zouzemudden ass a Punkto Energieverbrauch, Landverbrauch an Nuisancen fir d'Leit. Do misst een opweien, wat et eis bréngt a wat et kascht. Ob hien déi selwecht Decisioune wéi säi Virgänger an deenen Dossiere geholl hätt, wier elo schwéier soen. Et wier awer e Fakt, datt et haut Tensioune géif, op déi ee méi misst oppassen. Bei engem Projet wéi Google, dee schonn um Lafen ass, hätt hien awer och lo guer net de Pouvoir, fir deen ze stoppen, och wann hien dat wéilt. Wichteg wier, datt den Technologiekonzern elo kloer seet wat se wëlles hunn an den Dialog mat de Leit um Terrain gesicht gëtt.

Haart mä sachlech Diskussiounen an der Regierung

Den Equiliber tëscht engem staarke Parteiprofil an der Koalitiounsraison wier net ëmmer einfach ze fannen, sot de Franz Fayot och. De Koalitiounsprogramm géif a ville Beräicher d'Handschrëft vun der LSAP droen. Elo misst ee se ëmzesetzen, natierlech an der Diskussioun mat de Koalitiounspartner. Datt dat net ëmmer einfach wier, dat wier gewosst. Dat hätt een nach am Dezember am Klimadossier gesinn.  Och bei der Steierreform seet de Franz Fayot interessant Diskussioune viraus.  Mä och wann d'Diskussioune haart, méi sachlech gefouert ginn, géif een um Enn awer ëmmer op ee gemeinsamen Nenner kommen.

Bei Reiwungspunkte wéi enger Ierfschaftssteier an direkter Linn oder enger Kapitalsteier wier gewosst, datt dat net mat enger DP ze maache wier, sou den designéierte Wirtschafts- a Kooperatiounsminister. Dat géif och net am Koalitiounsprogramm stoen a wier och net Inhalt vun der Steierreform. De Franz Fayot perséinlech fënnt awer nach ëmmer, datt iwwert d'Ierfschaftssteier oder aner Steieren déi de Logement ukierpen geschwat misst ginn.

Virun engem Joer war net ofzegesinn, datt ech an der Regierung landen.

Den designéierte Minister muss, duerch säi Wiessel an d'Regierung, d'Presidence vu senger Partei no net mol engem Joer opginn. Virun engem Joer wier net ofzegesi gewiescht, datt dat just vu sou kuerzer Dauer wier.

Och wann hien net méi LSAP-Parteipresident ass, géif him d'Erneierung vu senger Partei weiderhin um Häerz leien, sot eisen Invité vun der Redaktioun. Et wier an deem Sënn scho villes lassgetrëppelt ginn, och wann dat nach net esou visibel wier.

Seng potentiell Nofollgerin un der Parteispëtzt, d'Françine Closener , wier och déi richteg Persoun fir dëse Renouveau weiderzeféieren.

Invité vun der Redaktioun: Franz Fayot

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.