E Méindeg de Moie war den Deputéierte vun de Piraten eisen Invité vun der Redaktioun.

Et wier un der Zäit mam "Etat de Crise" opzehalen. Zum Beispill d'Demonstratiounsrecht misst nees geséchert sinn, natierlech ënnert den adequate Sécherheetsmesuren. Dat sot de Sven Clement e Méindeg de Moien am RTL-Interview. Hie war eisen Invité vun der Redaktioun.

Den Deputéierte vun de Piraten ass skeptesch wat d'Pandemie-Gesetz ugeet. Hei dierfte keng weider Aschränkunge vun de Grondrechter einfach iwwer groussherzoglech Reglementer, erméiglecht ginn.

De Krisemanagement vun der Regierung wier gutt gewiescht um sanitäre Plang. Ekonomesch gouf ze lues an net gutt genuch reagéiert. D'Sue fir ze Hëllefe ginn zwar an de Grapp geholl, mä se kéimen net ëmmer iwwerall un, sou de Sven Clement weider. Zum Beispill bei klengen an de mëttelgrousse Betriber. Do misst nogebessert ginn.

D'Zesummenaarbecht an der Coronakris géif och ze wënschen iwwreg loossen. D'Regierung hätt just informéiert, awer net mat der Oppositioun zesummeschafft.

Op den Tracing ugeschwat, also d'Noverfollge vun Infektiounen, sot den Deputéierte vun de Piraten, den analogen Tracing géif gutt funktionéieren. Dat wär déi proppersten a perséinlechste Method.

D'Pirate si strikt géint eng Tracing-App, wa se mat Zwang an Diskriminatioun ze dinn hunn. Wann et eng fräiwëlleg App géif ginn, misst et e Gesetz ginn, dat kloer reegelt wat däerf wou stockéiert ginn. Eng zentral Späicherung op engem Server kënnt fir de Sven Clement guer net a Fro, dat dierft just um Smartphone selwer sinn. An dann nach wieren d'Pirate ganz skeptesch wat de Mehrwäert wier.

Léieren aus dëser Kris si fir de Pirat Clement, datt ee sech muss déi néideg Outilen a Reserve ginn, fir an Zukunft besser op esou eng Pandemie ze reagéieren.

Invité vun der Redaktioun: Sven Clement

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.