En Donneschdeg de Moie war de President vum Nohaltegkeetsrot eisen Invité vun der Redaktioun.

Den ieweschten Nohaltegkeetsrot preparéiert eng Etüd iwwert den ekologeschen Foussofdrock vu Lëtzebuerg, déi am August soll presentéiert ginn. Dat huet den neie President vum Nohaltegkeetsrot Romain Poulles en Donneschdeg de Moien hei op RTL annoncéiert. Den ekologesche Foussofdrock rechent aus, wéi vill Ressourcen d’Land opbraucht. Laut den internationalen Footprint Network huet Lëtzebuerg nom Qatar deen zweetgréissten Foussofdrock an huet am Februar schonn all d’Ressourcen opgebraucht, déi d’Land theoretesch zegutt hätt.

Am Zesummenhang mat der Corona-Pandemie misst een dem Romain Poulles no „elo endlech Conclusiounen zéien an eis nei opstelle fir méi krisesécher ze ginn, fir méi widderstandfäeg ze ginn“. Déi nei Orientéierung géing zwar net vun haut op muer goen, mee et misst ee sech méi lokal a regional opstellen, de Gesondheetssystem stäerken an d'Ernärungsketten nei opstellen.
Dat hätt säi Präis, mä wier en Invest an d'Zukunft, sou de Romain Poulles.

De President vum Nohaltegkeetsrot an Ingénieur huet och fir eng nei Form vun Tripartite plädéiert, wou d’Regierung zesummen mat de Produzenten a Verbraucher – oder Gebraucher – en neien ekonomesche Modell ausschafft. De Verzicht, dat wier dem Romain Poulles no allgemeng keng Léisung. Vill méi misst een Weeër fannen, fir d’Ressourcë besser ze gebrauchen.

Invité vun der Redaktioun: Romain Poulles

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.