E Méindeg de Moie war déi gréng Ëmweltministesch eis Invitée vun der Redaktioun.

Den CSV-Parteipresident Frank Engel kritt weider Ënnerstëtzung vu Regierungssäit. Nom LSAP-Minister Dan Kersch krut hien e Méindeg de Moien op RTL och vun der grénger Ministesch Carole Dieschbourg de Réck gestäipt. De Frank Engel huet virum Weekend ëffentlech fir eng méi héisch Besteierung vum Verméige plädéiert an ass dowéinst am Clinch mat senger eegener Partei.

De Frank Engel „leet e Fanger an d’Wonn andeems hien déi sozial Ongerechtegkeeten uschwätzt“, sou d’Carole Dieschbourg e Méindeg de Moien. Déi gréng Ëmweltministesch sot, et wier och zu Lëtzebuerg néideg elo iwwert eng sozial gerecht an ekologesch Steierreform ze diskutéieren. Op d’Fro, ob déi Gréng dann och fir eng Ierfschaftssteier an direkter Linn, mä mat Abattemente wuel gemierkt, wieren, dozou sot d’Carole Dieschbourg, si wéilt keng Ausso maachen, mä et wier wichteg déi eenzel Moyenen ze beschwätzen.

Jughurtsfabrick

De Projet "Fage" dann - déi ominéis Jughurtsfabrick, déi sech tëscht Beetebuerg an Diddeleng soll implantéieren – do wier een an der Prozedur nach net duerch, sou d’Ëmweltministesch. Et géing nach Spillraum ginn, beispillweis beim Ëmweltschutz missten nach Saache gekläert ginn. D’Consultatioun vun de Bierger ass ofgeschloss, an elo wäert och de Ministère déi Froen déi opgeworf goufen nach emol ganz kritesch hannerfroen. Dozou gehéiert den héije Waasserverbrauch, wouduerch de Projet fir d’gréng Ministesch weiderhi "problematesch bleift“.

Kloer wier, sou d’Carole Dieschbourg, datt d’Philosophie vu Fage net déi wier, déi d’Regierung sech fir nei Betriber am Land géing wënschen, an och net déi, fir déi d’Ëmweltministesch an de Landwirtschaftsminister Romain Schneider an hire Ressorte géingen astoen.

Invité vun der Redaktioun: Carole Dieschbourg

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.