De President vum Syvicol war um Méindeg de Moien eisen Invité vun der Redaktioun.

Enttäuscht a Frustréiert. Esou hätt ee sech beim Gemengesyndicat Syvicol no der Entrevue d'lescht Woch mat der Regierung gefillt.

Dat sot hire President Emile Eicher e Méindeg de Moien am RTL-Interview. Hien hätt keng Bereetschaft gespuert, fir de Gemengen entgéintzekommen. Dobäi hätt een nëmmen eng éierlech an transparent Subventiounspolitik gefuerdert. Duerch d'Corona-Kris kréien d'Gemenge jo 420 Milliounen Euro manner an d’Keesen. Wann d'Kris sech net verschäerft, soll et nächst Joer awer nees besser goen. Ma net just d'Recetten hu wärend der Corona-Kris ofgeholl, och d'Depensë fir d'Gemenge wären an d'Luucht gaangen.

Net all Gemeng kënnt gutt duerch dës Pandemie  

D'finanziell Situatioun ass ënnerschiddlech vu Gemeng zu Gemeng. D'Stad Lëtzebuerg hätt zum Beispill Reserve vun iwwer enger Milliard. Et géingen awer och e puer Gemenge ginn, déi elo scho richteg Problemer hätten. An dës wäerten hir Investissementer elo bremsen, bis se wëssen, wéi et konkret weidergeet, erkläert den Emile Eicher. Hei wieren zum Beispill weider adaptéiert staatlech Subventiounen néideg.

An Däitschland wär e Rettungsschierm opgezu ginn, wou d'Gemengen elo géinge Kompensatioune fir hir Verloschter kréien. Och an der Belsch géing de Gemengen ënnert d'Äerm gegraff ginn. De Syvicol géing mol keng Kompensatioune fuerderen, erkläert de President.

Gemenge fuerderen adaptéiert Subventiounen

Wann d'Gemenge sollen investéieren an d'Wirtschaft nees soll dréinen, da wär de Gemenge am meeschte gehollef, wa se déi Investitiounen, déi an hirer Missioun sinn, géinge gerecht finanzéiert kréien. Den Ament wären déi meescht Subventioune plafonéiert, mä zum Beispill bei de Maison Relaisen do wär d'Basis déi leschte Kéier viru 15 Joer adaptéiert ginn. Zanterhier wieren d'Präisser awer explodéiert an et géinge mëttlerweil och nach vill méi Ëmwelt- a Sécherheetsstandarde ginn, déi ee misst erfëllen. Deemno géing net vill iwwereg bleiwen. Dofir d'Fuerderung, dass een dës Subventioune misst adaptéieren, sou den Emile Eicher. D'Regierung hätt dës Suerg zwar verstanen, mä d'Bereetschaft fir de Gemengen entgéintzekommen, hätt hien net gespuert, sou de President vu Syvicol. Dem Premier hätte méi d'Chrëschtmäert um Häerz geleeën.

Regierung consultéiert Gemengen net systematesch

Lescht Joer huet de Syvicol 45 Avisen zu Gesetzprojete geschriwwen, just 31 wäre vun der Regierung consultéiert ginn, obschonns de Premier Minister lescht Joer nach seng Regierungskolleegen opgefuerdert hat, d'Gemengen ze consultéieren, wa si och vum Gesetzprojet concernéiert wären. Déi eng hätten dat gemaach, constatéiert den Emile Eicher, déi aner hätten de Syvicol awer carrement ignoréiert. A 6 Fäll hätt ee sech souguer auto-saiséiert.

E Méindeg de Mëtteg presentéiert de Syvicol och eng Enquête, déi de Gemengesyndikat bei de Bierger gemaach huet. 91% vun de Leit géingen doranner verlaangen, dass d'Gemenge méi konsequent missten an de legislative Prozess agebonne ginn, sou den Emile Eicher.

Invité vun der Redaktioun: Emile Eicher

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.