De President vun der Chambre de Commerce war e Mëttwoch de Moien eisen Invité vun der Redaktioun.

Et wier falsch "einfach esou" eng Verméigenssteier anzeféieren, well et misst een als éischt emol definéieren, wat fir ee Verméigen ee besteiert. Dat sot de Luc Frieden e Mëttwoch de Moien hei op RTL. De Geschäftsaffekot, President vun der Chambre de Commerce a vun der BIL a fréieren CSV Minister war eisen Invité vun der Redaktioun. Hien huet gefrot, wéi een iwwerhaapt Verméigen kéint erfaassen: "Wéi bewäerte mir Haiser, Biller, Autoen an esou weider?"

Zweetens wier et gutt de Leit nach z’erlaben, Verméigen oder Erspuernisser opzebauen. De Luc Frieden huet sech dowéinst och kloer géint eng Ierfschaftssteier an direkter Linn ausgeschwat "well firwat sinn d’Lëtzebuerger méi wohlhabend ginn, egal aus wéi engem sozialen Ëmfeld ee kënnt? Well all Generatioun e bësse konnt opbauen op dat, wat seng Virfahren opgebaut hunn".

Ugeschwat op d'Konzentratioun vun engem groussen Deel vum bebaubaren Terrain an den Hänn vu ganz wéinege Leit a Gesellschaften, sot de Luc Frieden "et kann ee selbstverständlech iwwert d'Besteierung vun Immobilien och diskutéieren". Am selwechten Otemzuch huet de fréieren CSV-Finanzminister viru "Säiteneffekter" gewarnt. Besteiert een nämlech Immobilien an den Transfert vun Immobilien, da kéint dat senger Meenung no och d'Präisser nach weider an d'Luucht dreiwen.

De Luc Frieden huet och ëmmer erëm vu Besteierung vu Kapital op déi vum Akommes gekéiert: Lëtzebuerg hätt en "extrem sozial gerecht Steiersystem". 5% vun de Leit, déi am meeschte verdéngen, bezuele 50% vun de Recetten op d'Akommes an d'Entreprisen droen d'Hallschent vun der gesamter Steierlaascht, sou de Luc Frieden.

"Grouss" Suerg ëm d’Staatsfinanzen

Ee weidere Sujet war d'finanziell Gestioun vun der Corona-Kris. De Luc Frieden sot dat, wat d'Regierung an enger éischter Phas decidéiert huet, richteg war. Hie rechent och domadder, datt d'Ausgaben um Enn awer méi kleng wäerte sinn, well nëmmen d'Hallschent vun den Hëllefen ugefrot gi wieren. Obwuel doduercher "nach e bësse Sputt" do wier, sot de fréiere Finanzminister awer, och seng Suerg wier "grouss" wéinst der Staatsschold. Dës géing op den héchsten Niveau an der Geschicht vum Land zanter dem 2. Weltkrich géing klammen. Um Enn vum Joer an d'nächst Joer misst een ee geneeën Etat des lieux maachen an da misst een an den 2 oder 3 Joer duerno "esou wäit wéi méiglech de Budget erëm an den Equiliber ze bréngen, quasi den nämmlechten Exercice, wéi mer en 2012-13 gemaach hunn". Stabel Staatsfinanze géingen nämlech d'Leit an Investisseuren rassuréieren, well "d'Leit gesinn, datt et keng Steiererhéijunge ginn", sou de fréiere Finanzminister, deen awer net gesot huet, datt 2010 d'Solidaritéitssteier vun 2,5 op 4, respektiv 6% an d'Luucht gesat gouf an tëscht 2010 an 2012 eng Krisesteier vu 0,8% agefouert gi war.

Invité vun der Redaktioun: Luc Frieden

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.