Den neien Deputéierte vun der ADR war en Donneschdeg de Moien eisen Invité vun der Redaktioun.

Hie géing an der Kontinuitéit vum Gast Gibéryen weiderfueren, sou den neien ADR-Deputéierte Fred Keup. Hie war en Donneschdeg de Moien den Invité vun der Redaktioun.

D'ADR wier sozial a konservativ. D'Partei géing sech fir d'Famill, d'Land, d'Sprooch an d'Kultur asetzen. Och d'Educatioun wier säin Dossier, sou de Geographie-Professer Keup.

D'Initiativ Nee2015/Wee2050 huet sech jo gegrënnt fir géint d'Auslännerwalrecht virzegoen. Dës gouf an der Vergaangenheet fir verschidden Aussoe kritiséiert. De Grënner Fred Keup wëll weider mat den aktuelle Responsabelen a Kontakt stoen, allerdéngs net méi am Numm vun der Initiativ schwätzen an Zukunft.

Datt hie friemefeindlech wier, an datt d'ADR mat him méi wäit no riets géing réckelen, dat wier komplett lächerlech an iwwert sou Aussoe kéint hie just de Kapp rëselen, sou de Fred Keup. Hei géing einfach e Schëllege fir den Ausgang vum Referendum gesicht ginn.

A punkto Migratiounspolitik sollt een de Leit sur Place hëllefen, amplaz se an Europa ze ruffen, seet de Fred Keup.

Kritik koum um Ausseminister Jean Asselborn. Dee sollt méi Manéiere weisen, wann en op internationale Plateauen iwwer aner Länner a Politiker schwätzt. Et wier een op d'Frëndschaft mat anere Länner ugewisen.

D'Koalitiounspartner aus der Dräier-Regierung géinge sech ënnerteneen net méi fannen, fënnt nach de Fred Keup.

Bei de Rieden dës Woch hätt eng staatsmännesch Visioun gefeelt, sou den neien ADR-Deputéierten.

Invité vun der Redaktioun: Fred Keup

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.