E Freideg de Moie war den Ombudsman fir Kanner a Jugendlecher eisen Invité vun der Redaktioun.

D'Corona-Kris ass deelweis eng immens Belaaschtung fir Kanner a Jonker. Normal Routine a Schoule, Fräizäit a Famill si gestéiert, dat sot den Ombudsman fir Kanner a Jugendlecher, de René Schlechter, de Freideg de Moien am RTL-Interview.

D'Ongewëssheet, wéi sech d'Situatioun entwéckelt, wier och ee Facteur. Et misst een och op den ëffentlechen Discours oppassen. Kanner dierften net als Virus-Träger stigmatiséiert ginn, déi d'Leit ustiechen.

Positiv wier, datt déi Jonk hautdesdaags déi nei Medie kënnen notze fir hir sozial Kontakter. Dowéinst wier den aktuell méi héije Mediekonsum net esou schlëmm, sou de René Schlechter.

Dramatesch wier och, datt d'Veräinsliewen nees gestoppt gouf. Do kéinte Jonker an e Lach falen, well hir Struktur, déi se iwwert d'Woch haten, zum Beispill duerch Training, net méi ginn ass.

Datt sech Kanner am Covid-Kontext irresponsabel behuelen, wier normal. Et wier hire Beruff, Grenzen ze testen. Dat wier vläicht problematesch par rapport zur Pandemie, awer normal an der Jugend.

De Covidvirus wier en schläichenden Trauma, dee vill Energie kascht, ouni datt een et géif mierken, seet de René Schlechter, Ombudsman fir Kanner a Jugendlecher.

Dowéinst missten Elteren an Enseignanten dem Wuelbefannen vun de Kanner grad an dësen Zäiten nach méi Importenz ginn.

Invité vun der Redaktioun: René Schlechter

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.