En Dënschdeg de Moie war d'Ombudsman eis Invitée vun der Redaktioun.

Mir kënnen d'Leit net méi esou spontan empfänken ewéi soss. Lo geet villes iwwer Telefon an E-Mail. Doduerch geet natierlech de perséinlechen, de mënschleche Kontakt verluer, deen awer wichteg wär. Dat sot d'Ombudsman Claudia Monti am RTL-Interview um Dënschdeg de Mueren. Den Ombudsman vermëttelt, wann et Problemer tëscht Privatleit a staatlechen oder kommunalen Administratioune gëtt.

Ombudsman wier mëttlerweil eppes wéi den „SOS Détresse“

D'Liewe geet virun trotz der Kris, dowéinst hätt een ongeféier genee souvill Dossiere wéi d'lescht Joer ëm dës Zäit, ongeféier 800. Verschidde Problemer hätte sech awer mat der Kris verschäerft. Dossieren dréinen dacks ëm Wunnengsnout, Problemer fir eng Assistance sociale ze fannen oder wat dann och nei wär, alles wat mat den Aidë vun der Regierung ze dinn hätt. Wat och opgefall wier, wär dass een déi Ulafstell ass, wa soss keen op den Telefon geet. Mëttlerweil wier een eppes wéi "SOS Détresse". Zum Beispill och fir de Leit d'Covid-Gesetzer ze erklären. D'Onsécherheet wier grouss, sou d'Ombudsman.

Et gëtt den Ament keng Perspektiv

Dat wat eekleg wier an dëser Kris, wär dass ee keng Perspektiv hätt an net wéisst wou et géing higoen. Alles wat mat der Adem ze dinn huet, wou d'Leit vläicht am Chômage partiel sinn oder carrement am Chômage, wier natierlech vill gefrot. Och am Fonds de Logement géinge vill Dossieren hänken. D'Leit hätten natierlech Versteesdemech, mä vun engem gewëssene Punkt un, besonnesch wann een op Hëllef ugewisen ass an an enger vulnerabeler Situatioun ass, géing d'Situatioun méi brenzeleg ginn.

Teletravail fonctionéiert net am soziale Milieu

Wéi schlëmm d'Situatioun wierklech ass, géing vun de Secteuren ofhänken. Am Horesca-Beräich oder fir d'Foraine wier d'Situatioun natierlech ganz schlëmm. Mä besonnesch Leit, déi schonn an enger vulnerabeler Situatioun waren, wären et elo nach méi. Wann een drop ugewise wär, fir kënne bei d'Stëmm vun der Strooss iessen ze goen, dass een eng Assistante sociale bräicht, dass een drop ugewise wär beim Surendettement gehollef ze kréien, dass ee kéint bei den Fonds national de solidarité goen.

Teletravail wär zwar eng super Saach, mä dat géing eben am soziale Milieu net fonctionéieren, wou de perséinleche Kontakt essentiell wär, erkläert d'Claudia Monti. Digitaliséierung wär och e super Wuert, mä et wär net all Mënsch digital op der Héicht.

Nach méi Hotlinen opbauen

Et sinn eng Rei Leit, déi wärend dëser Pandemie op der Streck bleiwen oder hannendrun hänken, dat wär ganz kloer. Eng Léier aus der Pandemie wier, wéi wichteg mënschleche Kontakt ass, an datt d'Kommunikatioun misst verbessert ginn. Dofir wär et wichteg, fir iwwerall do, wou et ëm dat Noutwennegst geet, Hotlinen opzebauen, dass ee wéinstens een op den Telefon géing kréien. Verschidden Administratiounen a Gemengen hätten dat scho gemaach. Donieft misste reegelméisseg Pressekonferenzen a Meetingen organiséiert ginn, wou een objektiv Erklärunge vun Experte géing kréien, fir dass een eenzel Mesurë vun der Regierung kéint novollzéien.

D'Claudia Monti begréisst iwwerdeems, datt trotz Covid Visitten am Prisong méiglech bleiwen. Si versteet awer net firwat dat net och an Altersheemer a Foyere kann organiséiert ginn.

Invité vun der Redaktioun: Claudia Monti

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.