E Mëttwoch de Moie war den Dr. Philippe Turk eisen Invité vun der Redaktioun.

D'Capacitéiten si schwéier belaascht. An dat géif een nëmmen eng gewëssen Zäit packen. Dat sot den Dr. Philippe Turk vun der Covid-Krise-Cellule vun der Regierung, zoustänneg fir d'Koordinatioun vun de Spideeler, am RTL-Interview um Mëttwoch de Moien. Hie war eisen Invité vun der Redaktioun.

Soulaang d'Infektiounszuelen esou héich bleiwen, géif sech d'Situatioun an de Spideeler net berouegen. Et misst massiv deprogramméiert ginn. Dowéinst wier et net vu Muttwëll, datt nei Restriktiounen envisagéiert ginn.

Eng 50 Covid-Patienten op der Intensivstatioun, dat wiere 50 Better manner fir aner Patienten. Et hätt een och am Verglach mat Frankräich a par Rapport zu der Populatioun méi Intensivbetter beluecht, wéi eisem franséischen Noper.

Déi akut Net-Covid-Fäll géifen awer nach ëmmer behandelt ginn.

D'Schnelltester, déi elo kommen, géifen hëllefe verschidde Situatioune besser ze reegelen, an den Urgencen z.B. oder beim Personal, wat eventuell Symptomer huet. Déi Tester hätten awer vill méi eng schwaach Sensibilitéit. Am meeschte maache se Sënn bei Leit mat Symptomer, soss riskéiere se falsch-negativ ze sinn, sot den Dr. Turk. Déi Schnelltester ginn och net duerch en normale Laboratoire validéiert. Wann e positiivt Resultat also net iwwer e PCR-Test validéiert gëtt, feelt dee Fall an der Statistik. De Covid ass awer „meldepflichteg“.

D'Zuel vun den Nei-Infektiounen – déi soll jo dës Woch op ënner 500 gedréckt ginn, soss kommen nei Mesuren - wär och relativ, well déi géif och vun der Teststrategie ofhänken, wéi vill Leit sech teste loossen, huet nach eisen Invité ënnerstrach.

D'Personal an de Spideeler wär nach ëmmer de kloren Enkpass. Dowéinst géif een ënnert anerem probéiere pensionéiert, medezinescht Personal ze reaktivéieren.

De Kampf géint de Coronavirus wär e Marathon, kee Sprint. Dat sot de Premier. Deem kéint sech den Dr. Philippe Turk nëmmen uschléissen.

Invité vun der Redaktioun: Dr. Philippe Turk

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.