E Méindeg de Moie war de President vun der Associatioun fir Droit de la concurrence eisen Invité vun der Redaktioun.

D'Gebäckentreprise Bahlsen, d'Supermarchéen Auchan, Cactus an Delhaize goufe rezent vum Conseil de la Concurrence sanktionéiert a mussen zesummen 3,3 Millioune Strof bezuelen. Et goufe Präisofsprooche constatéiert. De Maître Gabriel Bleser vun der Associatioun fir Konkurrenzrecht huet de Méindeg de Moien am RTL-Interview explizéiert, datt Bahlsen de Supermarchéë wuel Präisser recommandéiert huet, mam Zil, dëse Präis an d'Luucht ze dreiwen. D'Supermarchéen dierften am Géigenzuch Remisë kritt hunn.

Hei schwätzt ee vu vertikalen Ofsproochen, sou de Konkurrenz-Expert. Op internationalem Niveau wieren awer horizontal Karteller de gréissere Problem, wann zum Beispill zwee Mëllechproduzente sech concertéieren.

Déi administrativ Strof vum Konkurrenz-Rot am Fall Bahlsen ass nach net definitiv. Dono gëtt et natierlech och Recours-Méiglechkeeten.
Wann d'Strof endgülteg gesprach sollt ginn, kéint de Konsument theoretesch Schuedenersatz froen.

Wann eng Entreprise mat den Autoritéiten zesummeschafft – sech zum Beispill selwer denoncéiert – da ka se eventuell manner héich oder guer net gestrooft ginn.

De Conseil de la Concurrence gëtt reforméiert. Ënner anerem gëtt do eng europäesch Direktiv ëmgesat, mam Zil, dëse Gremium méi onofhängeg ze maachen.

D'Associatioun fir Konkurrenzrecht verlaangt ënner anerem eng sougenannte Konzentratiouns-Kontroll virun enger Fusioun. Dat fir sécherzestellen, dass een Acteur keng ze dominant Positioun um Marché kritt. Leider wier dëst an der Reform vum Conseil net virgesinn. Am Ausland wär dat awer op ville Plaze scho laang de Fall.

Am Moment héiert een vun der Politik guer näischt zum Thema Konkurrenzrecht, huet de Gabriel Bleser e Méindeg de Moien op RTL bedauert. De Spezialist a Konkurrenzrecht sot, Lëtzebuerg wier dat eenzegt Land wou et keng Fusiounskontroll „ex ante“ gëtt, wou also eng Autoritéit iwwerpréift ob Firme kënne fusionéieren oder net an dat iert se fusionéieren. „Et ass lettre morte, et ass mol net diskutéiert ginn“, sou de Garbiel Bleser. Den Ex-Wirtschaftsminister Etienne Schneider hätt e Rapport an Optrag ginn, mä dee wier „am Tirang verschwonn, wéi sou vill Saachen zu Lëtzebuerg“, huet den Affekot kritiséiert.

Bei Fusiounskontrolle geet et drëms ze verhënneren, datt Firmen esou grouss ginn, datt se kënne vun enger dominanter Positioun um Marché profitéieren an zum Beispill Präisser duerchsetzen. Rezent hat d’Handwierkerkummer mam Fanger op déi staatlech Enovos gewisen déi eng Rei Firmen iwwerholl huet.

Allgemeng géing d'Konkurrenzrecht zu Lëtzebuerg nach ëmmer e bësse wéi e Stéifkand behandelt ginn, sou nach de Maître Bleser.

Invité vun der Redaktioun: Maître Gabriel Bleser

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.