E Freideg de Moie war den CSV-Deputéierten eisen Invité vun der Redaktioun.

D'Resultat ass sécher net schéin ze rieden, sou reagéiert de fréieren CSV-Spëtzekandidat Claude Wiseler op déi aktuell Sonndesfro. D'CSV géing jo do weider zwéi Sëtz verléieren a fënnt sech op historesch déiwem Niveau erëm. Woubäi ee misst soen, datt zum Beispill déi Gréng – a Prozenter ausgedréckt – nach méi verluer hätten, esou den Deputéierte Claude Wiseler.

Wouru läit et?
An enger Krisenzäit krit d'Oppositioun hir Meenungen net esou eriwwer bruecht. Dernieft hätte grouss Volleksparteien et hautdesdaags allgemeng schwéier.

Natierlech géifen awer och hausgemaache Schwieregkeeten hiren Deel dozou bäidroen. D'Leit dobaussen hätten d'CSV an de leschte Méint net als Ekipp gesinn, dat wier net gutt an dorunner misst ee schaffen.  

A wéi wäit dréit de President Fränk Engel Responsabilitéit fir den Ëmfroen-Déif?
Eng Fro, op déi de Claude Wiseler net wollt agoen. Hie géif net op eng Persoun klappen. Wann hien eppes matzedeelen hätt géing hien de Leit dat perséinlech soen an net bei engem Mikro.

De Fränk Engel hätt an der lescht Aarbechtsgruppen organiséiert an do wiere ganz positiv Usätz festzestellen. Wichteg wier, datt d'CSV als geschlossen Equipe weider zesumme géing wuessen.

Wat d'Wiel fir de Parteipresident am Mäerz ugeet, do wollt de Claude Wiseler net confirméieren, datt e Géigekandidat zum Fränk Engel soll opgebaut ginn.
 
Déi personell Erneierung bei der CSV leeft net sou of, wéi ee sech dat gewënscht hätt, well een eben net an d'Regierung komm wier wieren och keng nei Leit nogeréckelt. Bei den aktuell gewielte Vetrieder misst jidderee fir sech selwer decidéieren, ob e fir e jonke Plaz mécht oder net.

Déi chrëschtlech sozial Dimensioun wier iwwerdeems net a Fro gestallt, et sollt een net aus elektorale Grënn seng Identitéit opginn, woubäi een natierlech misst mat der Zäit goen.

D'CSV hätt wuel nach Chancë fir an enger nächster Regierung dobäi ze sinn, och als Senior-Partner. Bis 2023 misst een elo Alternativen op den Dësch leeën an d'Wieler iwwerzeegen.

Invité vun der Redaktioun: Claude Wiseler

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.