E Méindeg de Moie war d'DP-Conseillère aus der Stad eis Invitée vun der Redaktioun.

Am Zesummenhang mam Onsécherheetsgefill op der Gare freet d’DP-Politikerin Hélöise Bock méi Police, méi Preventioun a méi sozial Infrastruktur. Den Asaz vun zwou Ekippe vu private Sécherheetsleit am Stater Garer Quartier zanter Enn leschter Woch ass ëmstridden an d‘Héloise Bock huet e Méindeg de Moien hei op RTL betount: Eng Privat Sécherheetsfirma ass keng Léisung vum Problem! A sécher keen Ersatz fir d'Police.

Och wann de Feedback vun Awunner an Geschäftsleit aus dem Quartier an hiren Ae positiv wier, wier et just eng temporär Mesure déi fir eng „Deseskalatioun“ geduecht wier. An der Haaptsaach misst d’Police méi Moyene kréien. Tatsächlech wier den Effektiv vun der Police op der Gare verstäerkt gi viru puer Joer „mä dat geet net duer“, esou d’Héloïse Bock. D’Police géing der DP-Politikerin no och méi Kameraiwwerwaachung fuerderen.

Nieft der Repressioun a Preventioun missten och d’sozial Infrastrukturen ewéi d‘Fixerstuff gestäerkt ginn. De Problem op der Gare misst och dezentraliséiert ginn, „à terme och an der Stad“. D’Héloïse Bock huet awer bedauert, datt d'Akzeptanz vun der Populatioun fir sozial Ariichtunge op anere Plazen am Land opzemaachen, net grouss wier.

Invité vun der Redaktioun: Héloïse Bock

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.