En Dënschdeg war de Mëttelstandsminister eisen Invité vun der Redaktioun.

D'Clientë solle sech an den Akafszentere besser verdeelen. Hien hätt nom "Black Friday" de Shoppingzenteren ugeruff, fir Mënschenusammlungen ze verhënneren, dat sot de Mëttelstandsminister Lex Delles den Dënschdeg de Moien. Hie war eisen Invité vun der Redaktioun.

Eenzel Grande Surfacë géifen elo fräiwëlleg drop verzichten, Gedrénks oder Iessen ze verkafen, dat am Shoppingzenter selwer consomméiert gëtt. E Verbuet, fir de Mask ofzedinn, fir eppes z'iessen oder ze drénken, kéint och kommen, sou den DP-Minister.

Vill Akafszenteren hätte sech eppes iwwerluecht, fir d'Leit besser ze verdeelen. Et géif och kontrolléiert ginn, ob sech un d'Limitt vun engem Client pro 10 Meter Carré gehale gëtt. De Consommateur wär awer och gefuerdert a misst Responsabilitéit iwwerhuelen. An iwwerleeën, wéini en zum Beispill an e Buttek geet.

De Lex Delles huet d'Decisioun, d'Restauranten a Caféen zouzemaachen, verdeedegt, well et Plaze wieren, wou een ouni Mask eng länger Zäit verbréngt. Am Commerce wär dat net de Fall.

E verkafsoppene Sonndeg hätt och de Virdeel, datt sech d'Clienten op 7 amplaz op 6 Deeg kéinte verdeelen.

Nach wär allgemeng net decidéiert, wéi et nom 15. Dezember weidergeet. Ob déi 50-Euro-Bonge fir Iwwernuechtunge verlängert ginn - also och nach d'nächst Joer gëllen - wollt oder konnt de Minister den Dënschdeg de Moien nach net soen.

Invité vun der Redaktioun: Lex Delles

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.