En Donneschdeg de Moien war de President vun der Autosfederatioun Fedamo eisen Invité vun der Redaktioun.

Den Autofestival 2021 wäert sinn. Dat seet de President vun der Autofederatioun Fedamo. De President Philippe Mersch war en Donneschdeg de Moien den Invité vun der Redaktioun.

Natierlech wäert d'Evenement net oflafe wéi gewinnt. De Festival dauert zum Beispill puer Deeg méi laang, fir ze evitéieren, datt d'Leit all mateneen an d'Verkafsraim kommen. Da gëllt natierlech Maskeflicht, d'Hänn mussen desinfizéiert ginn an et gëtt Plexiglas-Trennmaueren. Hei gëtt sech ënner anerem op eng Charte sanitaire baséiert.
Et gëtt och keen Iessen a Gedrénks. Et gëtt sech eben op dat Weesentlecht konzentréiert, sou de Philippe Mersch.

E Méindeg kënnen d'Showroome jo nees opmaachen. 

Zejoert war natierlech kee gutt Joer a punkto Venten, et goufe ronn 10.000 manner Neiween verkaaft wéi 2019. Par Conter hätt de Verkaf vu méi deieren elektriséierte Ween dat bëssen opgefaangen.

2020 wieren d'Ventë vun Hybriden, Plug-In-Hybriden an Elektrogefierer ganz staark ugezunn. D'Kategorie vun de sougenannten elektrifizéierte Gefierer hunn zejoert am Ganze ronn 20% vun de Venten ausgemaach, bal 3 Mol sou vill wéi nach 2019.
Natierlech spillen do déi staatlech Primmen eng grouss Roll. D'Vetrieder vun der Autosbranche hoffen, datt dës iwwert de leschte Mäerz eraus verlängert ginn.

Invité vun der Redaktioun: Philippe Mersch

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.