E Méindeg de Moie war d'Gesondheetsministesch eis Invitée vun der Redaktioun.

Et wier ee prinzipiell zefridde wéi d'Impf-Campagne den Ament leeft. Och wann d'Vertraue vun de Leit an d'Impfen nach misst duerch Opklärungsaarbecht gestäerkt ginn. Dat sot d'Gesondheetsministesch Paulette Lenert e Méindeg de Moien am RTL-Interview, si war eis Invitée vun der Redaktioun.

Op de Weekend wier ee bei 23'000 Dosisse Vaccin gewiescht, déi bis ewell geliwwert goufen, also ronn 11'500 Persoune kéinten domadder geimpft ginn. Den Ament schéckt een Invitatioune fir d'Impfen eraus, wann ee bis d'Confirmatioun huet, datt Vaccine solle geliwwert ginn. An et reservéiert ee jo ëmmer déi 2. Dosis fir op Nummer sécher ze goen. Et misst kee fäerten, datt Vaccin gebunkert gëtt, deen net gebraucht gëtt, huet d'Gesondheetsministesch verséchert.

Den Impfstoff vun AstraZeneca ass jo elo fir d'EU zougelooss a soll och geschwënn hei am Land disponibel sinn. D'nächst Woch soll geliwwert ginn. 11'700 Dose waren annoncéiert ginn. Wann dat géif klappen, kéint ee mat der éischter Impf-Phase souguer éischter wéi geplangt fäerdeg ginn.

Nach wär net decidéiert, ob hei am Land eeler Leit iwwer 65 Joer de Vaccin vun AstraZeneca solle kréien. Dat soll an den nächsten Deeg geschéien.

D'Impfebereetschaft géif klammen. 48% vun den Invitéierten hätte sech e Rendezvous geholl. An de Spideeler wier d’Personal schonn zu 50% geimpft. An den Altersheemer bei de Residenten hätt ee bis ewell eng Impfbereetschaft vu 86%.

Et gouf jo Diskussiounen iwwert de geplangten Impfzenter zu Munneref, dee fir vill Leit am Osten net gutt géif leien. Et kann ee sech awer, wann et souwäit ass, säin Impfzenter eraus sichen, jee no Disponibilitéit wéi aktuell beim Large Scale Testing, sot d'Paulette Lenert. Et géif een och hoffen, datt méi spéit klassesch Vaccinen, déi méi einfach ze handhabe sinn, och vun Dokteren an de Cabinete kënne gesprëtzt ginn.

Héich vulnerabel Leit solle jo an der zweeter Phase geimpft ginn. Hei wiere verschidde Kategorien definéiert ginn. Den Ament gëtt et keng prinzipiell Contre-Indikatioun oder Krankheet, wou ee sech net soll impfe loossen. Mä virum Impfen géif een och ëmmer en Dokter gesinn, fir alles ofzeklären.

Op d'FFP2-Masken ugeschwat, sot d'Paulette Lenert, datt d'Santé se scho fir verschidde Leit oder verschidde Situatioune recommandéiert. Eng Verflichtung gëtt et awer net.

Kënnen d'Kanner en Dënschdeg liichte goen?, war nach d'Fro un eis Invitée vun der Redaktioun.
Et ass eng Fräizäitaktivitéit dobaussen. Soulaang et kee gréissere Rassemblement wier - mat Masken an Distanz - gesäit d'Santésministesch do kee Problem.

Invité vun der Redaktioun: Paulette Lenert

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu, op der App an am RTL Play ass d'Emissioun dono och am Replay ze fannen.