E Mëttwoch de Moie war d'Maréchale de la Cour eis Invitée vun der Redaktioun.

Et wier vill geschitt an deene leschte puer Méint zanter der Publikatioun vum Waringo-Rapport, dat sot d'Maréchale de la Cour, Yuriko Backes. Déi experimentéiert Diplomatin a laangjäreg Vertriederin vun der EU-Kommissioun zu Lëtzebuerg huet den 1. Juni d'Successioun vum Lucien Weiler iwwerholl a steet elo als Hofmarschall un der Spëtzt vun der neier Institutioun vun der Maison du Grand-Duc. E Choix, dee se bis haut eegenen Aussoen no net bereit hätt. Et hätt een ugefaangen, en zäitgeméisst Personal an eng modern Budgetsgestioun opzebauen, fir dem Grand-Duc deen néidege Support ze ginn, fir seng Aufgaben auszefëllen.

Serenitéit a Stabilitéit beim Personal

Zanter hirer Arrivée hätt et dann och keen Depart beim Personal méi ginn. D'Yuriko Backes schwätzt vun engem Paradigmewiessel an der Gestioun vum Personal, deen een duerch den Arrêté grand-ducal vum 9. Oktober erreecht hätt. D'Wuelbefanne vum Personal wier hir immens wichteg a wier och am Arrêté verankert. Allgemeng hätt sech d'Gestioun vum Personal an deem Sënn verännert, dass d'Mataarbechter elo all ënnert d'Fonction publique falen. Mir wëlle Serenitéit a Stabilitéit an d'Gestioun vun de Ressources humaines erabréngen, sou eis Invitée, déi betount, si wier elo als Hofmarschall responsabel als Chef d'Administration fir d'Personal. De Jeannot Waringo hat a sengem Rapport bekanntlech kritiséiert, datt d'Grande-Duchesse an der Vergaangenheet hei hiert Wiertche matgeschwat huet., wat iwwert hir eigentlech Kompetenzen erausgaangen ass.

Der Maréchale de la Cour no wieren d'Posten zejoert adequat via eng normal, transparent Rekrutementsprozedur ausgeschriwwe ginn. De Rekrutement ass iwwerdeems nach net ganz ofgeschloss. Eng 900 Leit hate sech fir 15 Plazen, dovunner 8 nei Plazen, am Organigramm gemellt. 9 Poste goufe besat, ma et gëtt nach notamment no engem Responsabelen an der Kommunikatioun gesicht an et bleiwen zum Beispill och nach Posten an de Ressources humaines an der Informatik ze besetzen. Et wéilt een awer sécher goen, déi richteg Leit fir dës Posten ze fannen an dat bréicht seng Zäit.

"Ech hätt deen Interview warscheinlech net validéiert"

Wat en Interview vun der groussherzoglecher Koppel an der Zäitschrëft Paris Match vu virun zwou Wochen ugeet, huet d'Maréchale de la Cour iwwerdeems confirméiert, dass si deen net validéiert hat. Dat, obschonn si am Prinzip fir déi extern an intern Kommunikatioun vum Haff responsabel ass. Esou wéi den Interview publizéiert gouf, hätt si den Interview wuel och net validéiert.
D'Aussoe vun der groussherzoglecher Koppel an deem Interview wollt d'Yuriko Backes net ëffentlech kommentéieren.
An deem Interview, deen an der virleschter Editioun vu Paris Match publizéiert gouf, gesäit d'Grande-Duchesse an der Reform vun der Monarchie eng Form vu Fraefeindlechkeet, an dat an engem Land, dat sech wéilt no baussen als Musterbeispill an der Chancëgläichheet ginn. Iwwerdeems de Grand-Duc betount, hien a seng Fra stéingen als Binôme am Déngscht vum Land. En Dënschdeg war deen Interview och an der Institutiounekommissioun vun der Chamber mam Premier Xavier Bettel zur Sprooch komm. De Staatsminister hätt sech do, dem Lëtzebuerger Wort no, net "amused" driwwer gewisen, datt deen Interview net mat him ofgeschwat gewiescht wier.

H. de L. Nous sommes un couple, mais aussi un binôme au service du pays. Lorsque je suis monté sur le trône, en 2000, il était évident que la personne avec laquelle j'allais partager ma vie me seconderait dans mes responsabilités. Cet apport est extrêmement important dans la fonction royale et la mission du chef de l'Etat. Franchement – et là je suis tout à fait catégorique –, je n'aurais pas pu mener à bien cette tâche, lourde de responsabi- lités et de sacrifices en termes de liberté, sans la femme que j'aime à mes côtés. Cela aurait été impossible, invivable.

M. T. de L. Tenter de réduire l'institution grand-ducale à un unique représentant de type présidentiel, c'est l'amputer. Alors que le Luxembourg se veut exemplaire en matière d'égalité entre hommes et femmes, il y a sans doute une forme de misogynie à vouloir effacer l'épouse du grand-duc. Je ne me permettrais jamais de me revendiquer l'égale de mon mari, j'ai trop de respect pour la place qu'il occupe ; mais de là à m'écarter de toute décision au sein d'une institution pour laquelle j'ai œuvré vingt ans.

Et wëll keen d'Grande-Duchesse ecartéieren

D'Fra vum Staatschef huet e wichtege Rôle an et wëll keen d'Grande-Duchesse ecartéieren, sou d'Yuriko Backes e Mëttwoch de Moien. Et wier ganz normal, datt eng Grande-Duchesse sech net an dat alldeeglecht Geschäft vun enger Administratioun amëscht. Si hätt do aner Aufgaben, déi si och géif ënnerstëtzen. D'Ëmsetzung vum Waringo-Rapport wier e Léierprozess, an deem si ganz enk géif mam Grand-Duc zesummeschaffen. Och an de Relatiounen tëscht dem Grand-Duc an der Regierung géif si keng Problemer gesinn.

Ugeschwat op der groussherzoglecher Koppel hiren Deplacement op Biarritz viru Chrëschtdag sot d'Maréchale de la Cour, si wier ganz sensibel fir déi Diskussioun, ma de Staatschef hätt sech virun e puer Deeg am ganz enke Familljekrees zeréckgezunn. De Grand-Duc wier 7 Deeg op 7 als Staatschef vum Land am Déngscht, ganz gewëssenhaft an all Deplacement wier mat der Regierung ofgeschwat.

Am Interview huet d'Yuriko Backes och ervirgehuewen, datt den Internetsite vum groussherzoglechen Haff am Esprit vum Waringo-Rapport iwwerschafft a moderniséiert gouf. An de Site vun der Grande-Duchesse wier dran integréiert ginn, wéi sech dat gehéiert. Dat wier eng wichteg Vitrinn no baussen.

Invité vun der Redaktioun: Yuriko Backes

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu, op der App an am RTL Play ass d'Emissioun dono och am Replay ze fannen.