E Mëttwoch de Moie war den Deputéierte vun de Piraten eisen Invité vun der Redaktioun.

Am Géigesaz zur Gesondheetsministesch Paulette Lenert ass fir d'Piraten d'Affär ëm d'Hôpitaux Robert Schuman (HRS) net ofgeschloss. Datt 3 Membere vum Verwaltungsrot vun HRS Mëtt Januar fréizäiteg geimpft goufen, kéint e Fall vu „Vol" duerstellen. Den Deputéierte vun de Piraten, de Sven Clement, huet déi Fro e Mëttwoch de Moien op jidder Fall hei op RTL opgeworf. Hien huet erkläert: De Vaccin ass vum Steierzueler finanzéiert an d'Spideeler kruten deen iwwert e Kontrakt zur Verfügung gestallt, fir dann hir Leit, déi e Kontrakt hunn, ze impfen. Hei sinn awer 3 Leit geimpft ginn, déi kee Kontrakt mam Spidol hunn an net um Terrain schaffen, sou de Sven Clement. Op d'Fro, ob d'Richtlinnen zum Zäitpunkt vun der Impfung vun de Membere vum Verwaltungsrot net onkloer waren, huet de Piraten-Deputéierte geäntwert: „Dat ass eng bëlleg Excuse!" 3 vun de 4 Spideeler hätten d'Richtlinne richteg interpretéiert.

Onofhängeg vun der juristescher Fro, ob de Vaccin geklaut wier, seet de Sven Clement: „Et ass krass, wann 3 Leit aus der haute volée vun der Lëtzebuerger Gesellschaft sech impfe loossen". Déi 3 Membere vum Verwaltungsrot hätte sech virgedréckt, iwwerdeems Leit, déi de Vaccin bräichten, ewéi Botzfraen oder Assistenten, nach net geimpft wieren.

Et kéint dem Sven Clement no sinn, datt den Direkter vun den HRS, de Claude Schummer, „wollt schéine Männche maachen", andeems hien d'Presidence vum Verwaltungsrot op d'Impflëscht gesat hätt. Trotzdeem huet de Piraten-Deputéierten déi 3 Membere vum Verwaltungsrot, déi geimpft goufen, opgeruff Verantwortung z'iwwerhuelen. Dem Sven Clement no wier dat Bescht gewiescht, se hätte sech fréizäiteg entschëllegt. „Hu se net gemaach, tout au contraire, an enger Arroganz vun der Muecht gëtt nach deenen anere Spideeler virgeworf, déi géifen hire Verwaltungsrot net schützen", sou de Sven Clement.

Affär Semedo: Wien huet wéini gelunn?

Eng weider Affär wier an den Ae vum Piraten-Deputéierten net ofgeschloss: Déi vun der Ex-DP-Europadeputéiert Monica Semedo. Dem Sven Clement no wéisst een hei nämlech nach ëmmer net, „wie wéini" gelunn hätt. D'DP-Parteipresidentin a Ministesch Corinne Cahen an de Premier Xavier Bettel soen, si hätten näischt oder wéineg gewosst. D'Monica Semedo seet, si hätt déi Leit scho ganz fréi a Kenntnis gesat. „Ee vun deenen 3 muss léien", sou de Sven Clement. Den Deputéierte fënnt et „ondrobar", datt een d'Vertrauen an d'Politik esou verspillt, just fir Parteipolitik iergendwéi ze schützen.

Clt-Ufa an Transparenz

D'Deputéiert kruten Abléck an den integrale Konzessiounsvertrag tëscht dem Staat, RTL-Group, Bertelsmann a Clt-Ufa. Aus Confidentialitéitsgrënn a well d'Analys nach net ofgeschloss wier, wollt de Sven Clement keng Detailer nennen. Hie sot awer, et stéinge Saachen am Vertrag, déi „problematesch" wieren. De Sven Clement huet „e bëssen d'Gefill", et wier een „e bësse séier iwwert den Dësch gezu ginn" an datt een „déi dobäi entstoend Hëtzt als Naschthëtzt empfonnt" hätt. Am Vertrag wiere Passagen, wou ee ganz vill an engem Saz kéint eran interpretéieren.

Et wiere politesch Choixe geholl ginn, iwwert déi an der zoustänneger Chamberkommissioun nach misst diskutéiert ginn.

Invité vun der Redaktioun: Sven Clement

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu, op der App an am RTL Play ass d'Emissioun dono och am Replay ze fannen.