E Freideg de Moie war den Direkter vun der Stëftung Hëllef Doheem eisen Invité vun der Redaktioun.

Leit iwwer 75 Joer ginn an der zweeter Phas vun der Impfcampagne elo no an no invitéiert, fir geimpft ze ginn. Den Direkter vun der Stëftung Hëllef Doheem huet de Freideg de Moien hei op RTL de Leit geroden, reegelméisseg an hir Bréifkëscht kucken ze goen, well wann een d’Invitatioun bis kritt huet, hätt ee just 5 Deeg Zäit, fir e Rendez-vous an engem Impfzenter ze huelen. De Benoît Holzem huet donieft geroden, wa méiglech den "dossier médical" scho prett ze hunn.

De leschte Freideg hätt bei der Stëftung Hëllef Doheem den Telefon scho vill gerabbelt. Wa bis méi Vaccin-Dosissen do sinn, respektiv méi Leit matenee geruff ginn, rechent de Benoît Holzem mat zousätzlechem "Drock" op d’Aarbecht vun Hëllef Doheem. Elo scho wiere Leit aus der Préretraite geruff ginn, fir eng Hand unzepaken, mee eventuell wäerte Leit aus dem Congé mussen zeréckgeruff ginn, "mee mir hoffen, datt et net dozou kënnt".

Ënnert de Seniore si Leit, déi nach ganz gutt eens ginn an anerer, déi zum Beispill schonn deelweis dement sinn. Donieft hunn déi eng Senioren nach eng Famill, déi hëlleft an anerer hu keng méi. D’Prestatairë vu Fleeg Doheem géinge sech un déi eenzel Situatiounen upassen, sou den Direkter vun Hëllef Doheem weider. De Benoît Holzem sot, et géingen och Gespréicher mat der Santé lafen, fir eventuell mobil Ekippe fir déi Senioren anzesetzen, déi net kënne sech deplacéieren, fir geimpft ze ginn. Dem Personal vun der Stëftung wier iwwerdeems gerode ginn, sech impfen ze loossen. Nodeems et eng gewëss Skepsis am Ufank ginn hätt, wier elo awer éischter eng positiv Dynamik do, sou den Direkter vun Hëllef Doheem.

"Merci fir d’Duerchhalen"

Souwuel d’Clienten ewéi d’Mataarbechter vun de Prestatairë vu Fleeg Doheem hätten e "ganz schwéiert Joer an de Been". De Benoît Holzem sot, d’Mataarbechter hätten eng sozial Distanzéierung musse maachen: souwuel op der Aarbecht ewéi am Privaten.

Op ee Joer gekuckt, huet Hëllef Doheem, am Zesummenhang mat der Hospitaliséierung doheem, eng 400 Covid-Positiv Patienten oder Clientë betreit. D’Hallschent dovunner waren eeler Leit, déi aner Hallschent Leit aus all den Alterstranchen.

Den Direkter vun Hëllef Doheem mengt, seng Mataarbechter an hien hätten hiert Bescht gemaach, fir keng Feeler ze maachen an huet senge Leit dowéinst "Merci fir d‘Duerchhalen" gesot. Elo géing ee Liicht um Enn vum Tunnel gesinn, fir nach dëst Joer zu enger Normalitéit zeréckzekommen.

Invité vun der Redaktioun: Benoît Holzem

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu, op der App an am RTL Play ass d'Emissioun dono och am Replay ze fannen.