En Dënschdeg de Moie war de Sozialminister eisen Invité vun der Redaktioun.

Invité vun der Redaktioun: Romain Schneider

Wéi wäerten extra-hospitaliär Strukturen an Zukunft ausgesinn?

De Projet, deen d'Fondatioun vun de Schuman-Spideeler an d'Gemeng Jonglënster wëlle realiséieren, duerchbrécht op alle Fall eng rout Linn a passt a keen Zenario, deen um Gesondheetsdësch definéiert gouf. Dat gesäit och de Sozialminister Romain Schneider sou. Hie war en Dënschdeg de Moien den Invité vun der Redaktioun.

A sengen Ae misst dee Projet sou ofgeännert ginn, datt en an en Zenario 3 passt. An dëser Kategorie sinn Antenne vu Spideeler virgesinn, wou mat Dokter-Societéiten zesummegeschafft gëtt.

Bei deem, wat um Gesondheetsdësch geplangt gëtt, wier et ausgeschloss, datt grouss international Acteuren zu Lëtzebuerg Praxissen opmaachen, fir Profit ze maachen.

E Grupp Radiologe wëll sou en Zenter opmaachen an huet och all d'Autorisatioune fir d'Apparater. Ma d'Medezinner beschwéiere sech, datt se bei de Prozeduren net weider kéimen. Et géing un der Tarifikatioun vun den Apparater hänken. Doriwwer misst d'Nomenclatures-Kommissioun entscheeden, seet de Minister Schneider dozou.

Wat d'Psychotherapie ugeet, wier de Kader gesat, de Reglement wier publizéiert. Lo géing eng Konventioun ausgeschafft ginn tëscht der CNS an de Psychotherapeuten.

Den Tiers-payant wäert 2023 Realitéit ginn. Den elektronesche System wier amgaangen ausgeschafft ze ginn, sou nach de Romain Schneider.

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.