En Donneschdeg de Moie war de President vum Apdikter-Syndikat eisen Invité vun der Redaktioun.

D’Apdikte si bereet a prett, fir Schnelltester ze maachen. E Konzept steet, mä wéini d’Apdikten dat maachen, op déi Fro huet d'Regierung nach keng Äntwert ginn, esou de President vum Apdikter-Syndikat um Donneschdeg de Moien hei op RTL.

Den Alain de Bourcy sot, hien hätt inoffiziell gesot kritt, d’Apdikte kréichen e Certificat, fir Leit kënnen als negativ ze stempelen. Wann en Test mol positiv wier, da misst déi Persoun a Quarantän an den Tracing d’Relève iwwerhuelen. Wann d’Persoun dat freet, misst déi och kënnen e PCR-Test maachen, fir d’Resultat ze confirméieren.

Wann d’Apdikter Schnelltester selwer maachen, muss un eng Rei Saache geduecht ginn. Den Alain de Bourcy huet erkläert, et bräicht een zum Beispill getrennte Raimlechkeeten, fir den Test ze maachen an duerno ze verwäerten. Et wier awer wéi gesot e Konzept op d’Been gestallt ginn, fir notamment mat de Gemengen zesumme Raimlechkeeten zur Verfügung gestallt ze kréien. Elo géing just op eng Decisioun vun der Regierung gewaart ginn. Net gekläert bleift allerdéngs d’Fro vun der Finanzéierung, well d’Aarbecht fir ze testen, géing net vum Staat rembourséiert ginn.

Den Alain de Bourcy sot och bei der Impfcampagne wieren d’Apdikter bereet ze hëllefen. D’Vaccine vu Pfizer/Biontech oder Moderna mussen zwar bei extrem déiwen Temperature stockéiert ginn, mä de Vaccin vun AstraZeneca – wann deen dann erëm agesat gëtt – kéint duerchaus och an den Apdikten ugebuede ginn. D’Leit kéinten en dann do ofhuelen a beim Hausdokter administréiert kréien.

Invité vun der Redaktioun: Alain de Bourcy

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.