E Mëttwoch de Moie war den Direkter vun der Union des entreprises eisen Invité vun der Redaktioun.

An der Kris ass Stabilitéit gefrot. Dofir wär elo de falsche Moment, un de Steieren ze fréckelen. Ob no uewen oder no ënnen, sou den Direkter vun der UEL, der Unioun vun de Lëtzebuerger Entreprisen. De Jean-Paul Olinger war wéineg begeeschtert vun enger Coronasteier, wéi d’LSAP se an d’Spill bruecht huet. D’Consommatioun misst ugekuerbelt ginn. E Steierdebat géing ëmmer nees gefouert ginn. Dem Jean-Paul Olinger no géing et hei am Land scho vill Steiere ginn.

Zur Verméigensbesteierung sot hien, Frankräich hätt seng Verméigenssteier an eng Steier op d’Immobilien ëmgewandelt. An deem Sënn ass d’Union des entreprises net formell géint eng Reform vun der Grondsteier, der Steier op de Grondbesëtz. Hei zu Lëtzebuerg wier d’Grondsteier „sécherlech e gutt Instrument fir Steiergerechtegkeet hierzestellen“, sou de Jean-Paul Olinger. D’Gemengen hätten dem UEL-Direkter no haut scho relativ vill Fräiheet, fir géint Terrainen a Wunnengen, déi eidel stoe gelooss ginn, mee déi Diskussioun géing d’Politik net gär féieren.

Ugeschwat op d’Krisegestioun, sot de Jean-Paul Olinger, et misst ee sech elo op dat konzentréieren, wat ee ka maachen. Dat wier engersäits d’Impfcampagne acceleréieren, anerersäits d’Ekonomie erëm opmaachen an dann och d’Relance duerch Investissementer ënnerstëtzen.

Invité vun der Redaktioun: Jean-Paul Olinger

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.