Um Mëttwoch war den Direkter vum Luxembourg City Tourist Office, Tom Bellion, eisen Invité vun der Redaktioun.

Et sinn e bësse méi Leit an der Stad, och wéinst den oppenen Terrassen, ma um Tourismusbüro wier ee bei 15-20% vun den Touristen, déi am Joer 2019 koumen. Dat seet den LCTO-Direkter Tom Bellion mat Bléck zeréck op d'Ouschtervakanz. Op alle Fall wier et wichteg, datt d'Terrassen op sinn, an datt nees e bëssen e soziaalt Liewe méiglech ass, sou den Invité vun der Redaktioun.

Fir d'Hotellerie geséich et awer net gutt aus, d'Occupatioun vun de Better léich bei 10 bis 15%, sou den Tom Bellion. D'Hallschent vun den Touristen an der Stad kéimen aus dem Grand-Duché, aus den Nopeschlänner kéimen net vill Persounen. Touriste vu méi wäit géingen natierlech komplett feelen, zum Beispill Leit aus Asien. Geschäftstourismus géif et och quasi guer kee ginn, an et géing och nach 2 bis 3 Joer daueren, bis déi Situatioun sech normaliséiert hätt.

Beim Touristebüro huet ee sech ëmgestallt, verstäerkt op Visites guidées gesat zum Beispill, bei deene strikt sanitär Mesuren agehale musse ginn.

Op déi no Zukunft gekuckt, wéisst een natierlech net, wat kéim, dofir hätt ee sech als LCTO op verschidden Zenarie preparéiert, sou den Direkter vum Touristebüro.

Den Tom Bellion hofft awer op e relativ normale Summer. Et wier scho gutt, wann dee sou géing gi wéi de Summer vun 2020.

Invité vun der Redaktioun: Tom Bellion

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.