E Mëttwoch de Moie war d'Stater Buergermeeschtesch eis Invitée vun der Redaktioun.

Et wier een net naiv. Gewëss géif et ëmmer Drogekriminalitéit an enger Stad ginn, ma an der Stad Lëtzebuerg wier d'Situatioun an der Lescht vill méi schlëmm ginn. Dat ass d'Reaktioun vun der Buergermeeschtesch Lydie Polfer de am RTL-Interview op d'Aussoe vum Policeminister Henri Kox, dass een misst relativéieren. An all Stad, wou vill Leit beienee kommen, géing et Kriminalitéit ginn. Déi liberal Politikerin wär iwwerrascht an souguer schockéiert gewiescht iwwert dës Ausso vum Policeminister. Et wieren elo einfach all d'Acteuren gefuerdert op lokalem wéi och op nationalem Plang: d'Police, d'Justiz, ma och d'Affaires étrangères, d'Immigratioun, d'Santé an engem gewëssene Sënn och d'Educatioun, sou d'Lydie Polfer.  Ma och d'Gemeng selwer wär gefuerdert an hätt scho vill ënnerholl. Eleng an de leschte Méint hätt een 30 weider Better fir Toxikomanen zur Verfügung gestallt, 20 Streetworkeren wären am Asaz an iwwer 20 Leit géingen am soziale Beräich schaffen, déi sech nëmmen dorëm géingen këmmeren. Mee dat eleng géing net duergoen. All d'Acteuren missten elo un engem Strang zéien.

Onnéideg Polemik

Et wär eng onnéideg Polemik ausgebrach iwwer d'Sécherheet an der Stad an dat géing Kengem hëllefen. Et wier wichteg elo zesummen d'Fakten ze kucken an no Léisungen ze sichen. D'Police misst méi Moyen'en kréien. De Platzverweis wär een Instrument dat d'Police misst kréie fir an verschiddene Situatioune kënne konkret ze hëllefen. Zum Beispill fir kënnen Drogéierter aus den Haus-Entréeën ze kréien. Do géing och un engem Text geschafft ginn, ma et géing och do net viru goen. Dofir huet d'Buergermeeschtesch op alle Fall kee Versteesdemech.

Ma och fir Leit déi illegal am Land sinn an och nach illegalen Aktivitéite géingen nogoen, déi misste konsequent nees heem geschéckt ginn. An och d'Santé ass gefrot  fir d'Situatioun ronderëm den Abrigado komplett z'iwwerdenken. Sou wei et ass, kéint et net bleiwe, erkläert d'Invitée.

„Note interministerielle“ léisst op sech waarden

Et hätt een se schonn e puer mol versprach krut. Eng „Note interministerielle“ vum Policeministere an Zesummenaarbecht mat all den concernéierten Acteuren fir zesumme géint d'Drogekriminalitéit virzegoen. Am September 2020 gouf et festgehalen am Mäerz wär et nach eemol an der Chamber- an och e puer mol an der Gemeng thematiséiert ginn, mee bis ewell géing een drop waarden.

Och op de Bréif den si dem Här Kox lescht Woch gemaach hat, hätt si bis ewell keng Äntwert kritt, sou d'Lydie Polfer. Do hat si notamment gefuerdert, dass méi Police-Patrulle missten duerch d'Stad goen.

Ass Funkstille tëscht dem Policeminister an der Buergermeeschtesch? Dorop äntwert d'Invitée just, dass si géing hoffen, dass de Policeminister wéisst, dass elo eng aner Vitesse misst opgeluecht ginn an dass een endlech misst virukommen.

Asaz vu private Sécherheetsentreprisen

D'Kriminalitéit ass an d'Luucht gaangen an dat trotz dem Asaz vun privaten Sécherheetsfirmen. Ass dat eng Faillite-Erklärung? Nee fënnt d'Lydie Polfer. Dass elo eng privat Sécherheetsentreprise am Asaz wier, wier och en Appell no Hëllef gewiescht. Et hätt een de Leit an de concernéierte Quartiere missen sou séier wéi méiglech hëllefen. Et hätt een d'Situatioun net einfach esou kënnen hinhuelen.

Et hätt een dofir d'Gardiennage Societéiten och elo vum 15. Mee un am ieweschten Deel vu Bouneweg engagéiert, well dat genau déi Zeen wier. Et géingen net genuch Police-Beamte ginn an et géing nach dauere bis all déi di elo ausgebilt ginn, fäerdeg sinn an esou laang kéint een net waarden.

Den Abrigado ass am aktuellen Zoustand net méi ze vertrieden

Et wär mëttlerweil einfach ze grouss. An et wäre vill Leit do, déi weder eppes mat der Stad, nach mam Land ze dinn hätten. An dofir wär een och am Kontakt mam Santésministère, déi fir den Abrigado responsabel an och bezuelen. Et misst een d'Struktur elo dezentraliséieren an awer och Moyene kréie fir ze kontrolléiere wien Accès kritt. Et géing ëmmer nees vun Zürich geschwat ginn, mee da misst een och all déi Moyenen hunn. D'Stad Zürich  hätt hir eege Police an do dierften och just Leit eran déi entweder aus der Stad oder aus dem Kanton wären, betount d'Buergermeeschtesch.

An enger Entrevue mat der Paulette Lenert hätt een och driwwer geschwat fir eng Struktur fir weiblech Toxikomanen ze schafen, well déi natierlech däitlech méi vulnerabel wieren. Et dierft op alle Fall net zu Konzentratioune kommen an och déi aner Gemenge wieren do gefuerdert. Et kéint net sinn dass sech all op der Stater Gare  an op Bouneweg konzentréiert.

Geet d'Buergermeeschtesch 2023 fir d'Stater DP als Spëtzekandidatin an d'Course?

Dat wär den Ament net hir Haaptsuerg, sou d'Lydie Polfer. Déi do Decisioune géinge spéitstens Enn d'nächst Joer zesumme mat der Partei geholl ginn, sou d'Invitée.

Den Invité vun der Radaktioun - Lydie Polfer

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.