E Mëttwoch de Moie war de Grégory Fonseca vun der Associatioun „Eran, Eraus an Elo?“ eisen Invité vun der Redaktioun.

Net méi Prisonge bauen, mä méi pedagogesch Konzepter!

Dat huet de Grégory Fonseca am RTL-Interview um Mëttwoch de Muere gefuerdert. Hien ass vun der d'Associatioun "Eran, Eraus an Elo?", déi sech fir besser Zoustänn am Lëtzebuerger Strofvollzuch asetzt.

E Beispill: Mat der Unité de Sécurité fir Jonker, der Unisec zu Dräibur, wier 2017 eng deier Struktur fir honnert Milliounen Euro gebaut ginn. 4 Joer drop géif opfalen, datt en anstännegt pedagogescht Konzept feelt. An elo géif iwwer weider repressiv Mesuren nogeduecht ginn. Donieft wier d'Unisec net ze kleng. Ma duerch d'Trenne vun de Geschlechter géif Plaz verluer goen. Hei missten aner Léisunge fonnt ginn, sou de Grégory Fonseca.

Méi Preventioun an de Schoulen

D'Associatioun fuerdert donieft och méi preventiv Aarbecht, notamment an der Schoul. Soubal e Problem bei engem Kand géif erkannt ginn, misst intervenéiert a gehollef ginn. E Jugendleche géing net vun haut op muer stroffälleg ginn, et wier een Entwécklungsprozess. Et misst da ganz geziilt mat deene geschafft ginn, zesumme mam Educatiounsministère a mat Sozialaarbechter, fir hinnen anescht ze hëllefen.

Aktuell ass d'Unisec zu Dräibur voll. Dat hat den Direkter Ralph Schroeder am RTL-Interview gesot an intermediär Strukturen an d'Spill bruecht, wou d'Jugendlecher zum Beispill an der Woch wären an da weekends kéinten heem goen. Dat wär sécherlech keng schlecht Iddi, et wär besser wéi Jugendlecher anzespären, fënnt eisen Invité, ma et wär nees e Schratt an déi falsch Richtung. Et bräicht aner pedagogesch Usätz, wéi zum Beispill  „Kick-Off-Gruppen“, wou ee Jugendleche mat engem Betreier zesummen ass, fir nees e Wee zeréck an d'Normalitéit gewisen ze kréien.
Och am Erwuesse-Prisong géing et un engem präventive Konzept feelen. A jee méi ee géing nei Prisonge bauen, jee méi géing een aspären. Den Taux d'incarcération zu Lëtzebuerg wier mat ee vun den héchsten an de westlechen europäesche Länner.

„Mëttelalterlech“ Zoustänn

Méi wéi eng Kéier huet d'Associatioun „Eran, eraus an elo?“ d'Zoustänn vum Schraasseger Prisong als „mëttelalterlech“ bezeechent. Dat wier natierlech iwwerspëtzt, sou de Grégory Fonseca, mä et hätt een erreecht, dass géing doriwwer geschwat ginn. Et géif e Mangel ginn u qualifizéierter Formatioun, keng Protection sociale, also wann een eng Incapacité de travail hätt, dann wär een net gedeckt an och de Loun vun 2€/Stonn, dat wär mënschlech Sklaverei, och dat wier natierlech iwwerspëtzt ausgedréckt. De Message, deen een do de Prisonéier géing ginn, wär dass sech éierlech Aarbecht net géing lounen, sou den Invité.

Neie Prisong, nei Méiglechkeeten

Ob den neie Prisong elo gebraucht géing ginn oder net, sief dohi gestallt, ma et géingen awer op d'mannst nei Méiglechkeeten doduerch opgoen. Schraasseg kéint moderniséiert ginn, et kéint méi an d'Formation qualifiante investéiert ginn an et kéint eng Educatioun op d'Bee gestallt ginn.
Op d'Fro, ob dat wäit genuch géing goen, äntwert de Grégory Fonseca, dass 2018 zwar déi gesetzlech Basis gi wär, och fir de Plan volontaire d'insertion, ma et géingen eng ganz Réi Règlements grand-ducaux nach feelen. Et géing also un der Ëmsetzung feelen. Et wär och nach ëmmer keng Formation qualifiante virgesinn.

Ënnerscheed tëscht Prévenu an Détenu

Am neie Prisong um Uerschterhaff sollen d'Prisonéier Formatiounen ugebuede kréien. Am Prisong zu Schraasseg si ronn 48 Prozent vun der Populatioun Untersuchungshäftlingen. Do wéisst een natierlech net, ob dës e puer Deeg oder e puer Méint am Prisong wieren, deemno wär et net méiglech, fir fir si Formatiounen z'organiséieren, dat hat de Serge Legil Direkter vun der Prisongsverwaltung präziséiert. Ma do misst een dann ënnerscheeden tëscht Prévenuen an Détenuen, sou de Grégory Fonseca.

Fir Untersuchungshäftlingen z'inhaftéieren, géingen et 3 Critèrë ginn. Do géing gekuckt ginn, wéi héich de Risiko vun enger Fuite ass, wéi héich de Risiko vun enger Récidive ass, de sougenannten „Obscurcissement des preuves“.
A wann déi 3 Critèren net ginn wären, da misst een d'Leit lafe loossen, sou den Invité.

Éischt Gespréicher mat der Justizministesch Tanson virun der Pandemie wiere gutt verlaf. Awer, Corona-bedéngt, bis elo, ouni Suivi gewiescht. Sou nach de Grégory Fonseca, vun der Associatioun "Eran, Eraus an Elo?"

Invité vun der Redaktioun: Grégory Fonseca

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.