En Dënschdeg war den Intensiv-Medezinner aus dem CHL eisen Invité vun der Redaktioun.

D'Coronasituatioun an de Spideeler huet sech berouegt. Een eenzege Patient ass den Ament nach op enger Intensivstatioun. Elo kéint sech d'Spidolspersonal vun de leschten 3 Coronawellen erblosen. Dat sot den Dr. Jean Reuter den Dënschdeg de Moien als eisen Invité vun der Redaktioun. Hie schafft am CHL op der Intensivstatioun.

Wéi geet et weider? Dat wier schwiereg ze soen. Wat ee wéisst, wier, datt d'Hospitalisatiounen zwou, dräi Wochen no der Hausse bei den Neiinfektioune kommen. Et misst een also ofwaarden. Positiv wier op alle Fall, datt e groussen Deel vun der vulnerabeler Populatioun geimpft wier.

Et misst een awer oppassen. Och wa bei Jonken de Risk fir e schwéiere Krankheetsverlaf kleng ass, sou kéinte si awer och mat "Long-Covid" geplot sinn. Dowéinst sollten och si sech onbedéngt impfe loossen. Déi zweet Dosis wier och essentiell.

Mam CovidCheck huet een den Dag vun der zweeter Impfung nees méi Fräiheeten. Den Dr Reuter nennt dat net ganz glécklech, och wann de maximale Schutz net méi wäit wier. Warscheinlech wär et awer méi lucide, nach eng bis zwou Wochen no der zweeter Dosis ze waarden, sou de Medezinner. Hie versteet awer, datt d'Regierung de Leit gewësse Fräiheeten zeréckginn huet, well d'Chiffere sou niddreg waren. D'Fro géif sech awer stellen, ob ee kéint sou weidermaachen. Warscheinlech géifen ee bis zwee Méint Impfcampagne feelen.

Hie bedauert och, datt nach keng Kräizimpfungen zu Lëtzebuerg gemaach ginn, dat heescht als éischt Dosis Astra an als zweet zum Beispill Biontech oder Moderna.

Ob eng méiglech Impfflicht beim Gesondheets- a Fleegepersonal ugeschwat, sot den Dr Reuter, datt hien haut eng aner Meenung hätt wéi nach viru Méint. Du war een am Ufank vun der Impfcampagne, huet nach informéiert a sensibiliséiert. Et ass him och géint de Stréch gaangen, datt vun Oppositiounssäit op d'Fleegepersonal geklappt gouf.

Am Gesondheetsberäich misst een der Wëssenschaft vertrauen. Elo wann de Prozentsaz vun der Vaccinatioun beim Personal net héich genuch wier, misst een iwwert eng Impfflicht nodenken. Dat wär och näischt Neits. Et gi schonn Impfungen am Gesondheetsberäich, déi verpflichtend sinn, zum Beispill déi géint Hepatite B.

Invité vun der Redaktioun: Dr Jean Reuter

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.