En Donneschdeg de Moie war d'Anil-Presidentin eis Invitée vun der Redaktioun.

Fir d‘Infirmières-Associatioun ass d'Impfflicht net dee richtege Wee. D'Anil géing jidderengem recommandéieren, sech impfen ze loossen, mä et wier besser opzeklären, wéi d'Leit z'obligéieren. Dat sot d'Anne-Marie Hanff um Donneschdeg de Moien, si war eis Invitée vun der Redaktioun.

Si géing och mengen, datt d'Fro vun der Impfflicht sech geschwënn net méi stelle géing, well d'Leit sech ëmmer méi impfe loossen. Dofir wier et och gutt, datt d'Leit sech mat der neier, aktueller Impfcampagne op hirer Aarbechtsplaz spontan kéinten impfe loossen.

Et wier normal, datt d'Personal am Ufank vun der Impfcampagne Bedenken hat, dee Moment wier zum Beispill och AstraZeneca negativ an de Schlagzeile gewiescht. D'Anne-Marie Hanff wollt net gëlle loossen, datt Mataarbechter aus dem Gesondheets- a Fleegesecteur aus Egoismus sech net géingen impfe loossen. "Wann et eis wierklech just ëm eis géing goen, hätte mer eis am Ufank vun der Pandemie all krank gemellt", sou d'Anil-Presidentin.

D'Anne-Marie Hanff huet och op de Rapport vum Spezialbeoptraagte Jeannot Waringo iwwert d'Gestioun vun der Pandemie an den Alters- a Fleegeheemer reagéiert. De Rapport wier net genuch an d'Déift gaangen, mä géing awer d'Constate vun den Infirmièren an Infirmiere confirméieren: d'Recommandatioune waren net ëmmer kloer, d'Responsabilitéiten och net an et bräicht ee Qualitéitskrittäre fir d'Fleeg. Schued wär och, datt een am Rapport zum Beispill net gewuer gëtt, wat ee kéint besser maachen, firwat déi eng Haiser keng, wéineg oder vill Fäll haten. Eng weider Etüd oder en Audit wäre gutt.

Datt de Secteur mat der Famill an der Santé zwou Tutellen hätt, wier och scho virun der Kris e Problem gewiescht, sou d'Anne-Marie Hanff. "Eis ass et egal, vu wiem d'Recommandatioune kommen", sot si. D'Anil hätt och driwwer nogeduecht, selwer Recommandatiounen auszeschaffen, inspiréiert un deenen, déi am Ausland gëllen, mä dofir wier d'Associatioun personell net gutt genuch opgestallt gewiescht.

Invité vun der Redaktioun: Anne-Marie Hanff

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.