En Dënschdeg de Moie war de Sport- an Aarbechtsminister eisen Invité vun der Redaktioun.

D'Coronasteier ass fir den Dan Kersch net vum Dësch. Hie géif net zu deene gehéieren, déi am Mäerz eppes soen an dann am Hierscht bei Géigendrock de Schwanz bäizéien, sot den LSAP-Vizepremier en Dënschdeg de Moien als eisen Invité vun der Redaktioun. D'Coronamesuren hätte bis elo 5 bis 6 Milliarden Euro kascht an et wär een nach net um Enn. Dat Lach misst gefëllt ginn, sou den LSAP-Minister. Eng allgemeng Steiererhéijung fir déi privat Stéit, fir d'Betriber oder en Ofwälzen op déi nächst Generatioune kënnt fir hien net a Fro. Eng Coronasteier wär fir d'Gewënner vun der Kris. Zum Beispill kéint een dat esou rechnen: d'Moyenne vum Gewënn vun de Joren 2015-2019 mat deem vun 2020-2021 vergläichen. Wären dat méi wéi 10%, kéint hie sech virstellen, datt de Betrib um Supplement 5 oder 10% Steiere bezilt. Fir hie wier et keng technesch Fro, mä eng politesch. D'DP soll da mol soen, wéi si d'Lächer wëll stoppen.

Allgemeng gesinn d'Zuele vum Emploi aktuell gutt aus. De coronabedéngte Chômage partiel vun der Regierung hätt honnerten an dausenden Aarbechtsplaze gerett, grad wéi Dosende Betriber. Déi Mesure hätt sech rentéiert, sou den Aarbechtsminister.

Den Dan Kersch war an der leschter Regierung Inneminister an hat d'Warnapp GouvAlert kuerz virun de Wale lancéiert. Déi huet bei den Iwwerschwemmungen net richteg funktionéiert. Den Dan Kersch schwätzt vun engem technesche Problem, Lizenze wären net bezuelt ginn. Dat wär eng Ursaach. Fir an Zukunft ze warnen, misst e System agefouert ginn, deen net dovunner ofhänkt, datt d'Leit sech aktiv eng App eroflueden, esou de Minister weider.

Den Dan Kersch ass och Sportminister an huet sech dogéint decidéiert, fir op Tokio ze reesen. Et wären Olympesch Spiller ouni Zuschauer a Coronazäiten. Et wär net gutt, wa Politiker sech op Éierentribünen Sonderrechter eraushuelen. Hien hätt versicht, op europäeschem Plang eng eenheetlech Approche als EU ze fannen, mä dat wär net méiglech gewiescht. De President vum COSL hätt seng Decisioun verstanen. Et wär e bëssen Duerchernee gewiescht, och a sengem Kapp. Mä den Dan Kersch mengt awer, datt hien déi richteg Decisioun geholl huet. An hie géif mat Begeeschterung Tëlee kucken, ënnert anerem an der Nuecht op en Dënschdeg de Charel Grethen.

Reaktioun vun der DP

Eng Corona-Steier kéim fir d'DP iwwerhaapt net a Fro huet d’Corinne Cahen am RTL-Interview betount an domat op d’Aussoe vum Aarbechtsminister Dan Kersch de Moie bei eis op der Antenne reagéiert. Fir d’demokratesch Partei kéinten d’Lächer an der Staatskeess just duerch d’Croissance gefëllt ginn. Et misst ee Vertraue schafe beim Konsument a bei de Betriber mee och an de Betriber an d’Land an dofir misst een an der Steierpolitik stabel bleiwen, huet d’Parteipresidentin vun der DP nach betount.

Den Invité vun der Redaktioun: Dan Kersch

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.