E Mëttwoch de Moie war d'Gesondheetsministesch eis Invitée vun der Redaktioun.

21 Leit am Spidol, dovunner der 6 op enger Intensivstatioun, zanter dem Ufank vun der Pandemie 825 covid-liéiert Doudeger. Vun engen 4.300 Tester waren der e Méindeg 42 positiv.

Knapps 736.000 Impfdosisse goufe schonn am Grand-Duché gesprëtzt. 338.000 Persoune gëllen als komplett geimpft.

Dat sinn déi plakeg Zuelen, Stand Mëttwoch de Moien, vun der aktueller Corona-Situatioun zu Lëtzebuerg.

D’Santésministesch Paulette Lenert huet um 9.30 Auer op enger Pressekonferenz och de Point iwwert déi aktuell sanitär Situatioun am Land gemaach.

Um Mëttwoch de Moie war si awer och schonn eis Invitée vun der Redaktioun, a sot sech relativ zefridden, well d’Situatioun zu Lëtzebuerg relativ am Grëff wier. Dat géif sécher och un de villen Impfunge leien.

D’Rendez-vouse bei den Doktere géife gutt lafen, an och den Impf-Bus, deen elo iwwert de Summer jo ënnerwee ass, hätt scho gudden Zoulaf gehat.

D’Impfung wier méi wéi jee d‘Léisung aus der Kris, seet d’Ministesch. Et géif ee kloer gesinn, dass fäerdeg geimpfte Leit quasi guer net méi an d’Spidol misste kommen.

Fir den Ament wiere weider keng méi streng Mesuren hei am Land virgesinn, wéi beispillsweis an Däitschland oder Frankräich. D’Paulette Lenert seet sech relativ zefridde mam Covid-Check-Regime. Gréisser Clusteren, wéi et se nach Nationalfeierdag gouf, wieren zanterhier ausbliwwen.

Coronasteier: et feelt nach den Detail

Wat d’Propos vun enger Coronasteier fir d’Krisegewënner ugeet, fënnt d’Paulette Lenert et "schonn erstaunlech, datt dat soll en Tabuthema sinn". D'DP ass jo ferm géint esou eng Steier, déi den LSAP-Vizepremier Dan Kersch proposéiert.

An enger Kris misst een awer iwwert alles kënne schwätzen, sou d’Gesondheetsministesch. Iwwerdeems hire Parteikolleeg, den Dan Kersch, konkret Proposen hei op RTL gemaach huet, war si awer der Meenung, datt et nach un Detailer feelt. D’Paulette Lenert sot, et misst ee mol kloer "verstoen, wat ass e Krisegewënner?" Et wier elo nach ze fréi, fir "jo oder nee" ze soen. Mee: "mir sinn eis alleguerte schëlleg", fir sech mam Thema ze befaassen, sou d’Paulette Lenert. Gutt Iddie géingen entstoen, wann een doriwwer debattéiert. Dat géing elo ustoen a si ass iwwerzeegt, datt een zu "engem Schluss" kéim.

Invité vun der Redaktioun: Paulette Lenert

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.