E Freideg de Moie war d'Ëmweltministesch eis Invitée vun der Redaktioun.

Bal ee Mount no den Iwwerschwemmunge vum 14. Juli ass de Staatsministère am gaangen, all Informatiounen ze sammelen. Och d’Waasserverwaltung an den Ëmweltministère leeschten hire Bäitrag, fir Léieren aus der Naturkatastroph ze zéien, sou d’Carole Dieschbourg e Freideg de Moien hei op RTL. Déi gréng Ëmweltministesch sot „mir sinn am gaangen, alles genee ze retracéieren“.

Et wier extrem heftege Reen gewiescht a si wier schonn déi lescht Wochen uechter d’Gemenge kucke gaangen, wéi eng Mesurë gegraff hunn oder wat nach kéint gemaach ginn. Wat op jiddwer Fall gegraff hätt, dat wieren d’Renaturéierunge vu Flëss, sou d’Carole Dieschbourg. Si huet awer och op en „Héischwaasser-Risiko-Management-Plang“ higewisen, dee kuerz virun den Iwwerschwemmunge presentéiert gouf, mä dee wier nach an der Consultatioun. D’Ëmweltministesch huet deklaréiert: De Staat ënnerstëtzt d’Gemenge bei lokale preventive Mesuren, awer och d’Landwirtschaft, déi sech misst upassen, oder nach d’Leit, déi a betraffe Géigende liewen.

Dat alles wier och Deel vun der Upassung un d’Verännerung vum Klima. Den neiste Rapport vum Weltklimarot prognostizéiert jo, datt esou Staarkreen-Evenementer méi dacks wäerten optrieden an der Suite vum Klima-Changement. D’Ministesch jugéiert dee Rapport, dee reng wëssenschaftlech opgestallt gouf, als ganz kloer an däitlech: D’Prognose wieren alarmant. Wichteg wier et awer d’Klimaziler ze erreechen, souwuel international wéi natierlech dann och national. 2020 hätt de Grand-Duché dat erreecht, an dëst Joer wäert een dat och maachen, sou d’Carole Dieschbourg.

Invité vun der Redaktioun: Carole Dieschbourg

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.